Ազգային ժողովի պատգամավոր Սամվել Ալեքսանյանը անցնող շաբաթ խորհրդարանում պատասխանել է լրագրողների որոշ հարցերին, ընդ որումՙ անվճար: Հիշեցնենք, որ Ալեքսանյանը ավելի վաղ հայտարարել էր, թե ինքն այսուհետ հարցազրույց է տալու միայն այն պարագայում, երբ իրեն վճարեն:
Ալեքսանյանը մասնավորաբար խոսել է սահմանադրական փոփոխություններից եւ շեշտել, որ «Մալաթիայի բնակիչները բոլորն էլ այո են ասելու սահմանադրական փոփոխություններին»: Ավելին, ըստ Ալեքսանյանի` «Մեր երկրում բոլորն էլ այո են ասելու փոփոխություններին, քանի որ այլ կերպ չի կարող լինել»:
Պատգամավորը, սակայն, չի մանրամասնել, թե ե՞րբ է պատրաստվում հայկական (իր) արտադրության վիսկիները արտահանել` կոնկրետ Շոտլանդիա: Մինչդեռ սա շատ կարեւոր է, քանի որ ապացուցում է, որ Սամվել Ալեքսանյանի համար առանձնապես կարեւոր բան չէ Սահմանադրությունը: Հակառակ պարագայում նա վիսկիի արտադրությամբ չէր զբաղվի` ԱԺ-ի պատգամավոր լինելուն զուգահեռ:
