«ԱԶԳ» խմբագրություն
Յուրաքանչյուր լրատվամիջոցի համար հատուկ նշանակություն ունի իր լսարանի հետ փոխադարձ կապը: Դա թույլ է տալիս պատկերացում կազմել հրապարակումների վերաբերյալ հանրության մոտեցումների եւ նրանում տիրող տրամադրությունների մասին: «Ազգը» մշտապես կարեւորել է իր ընթերցողների հետ կապը, ծանոթացել նրանց տեսակետներին` ինչպես դրվատող, այնպես էլ քննադատող, ի գիտություն ընդունել արված դիտողությունները:
Այս անգամ կցանկանայինք անդրադառնալ մեր մշտական ընթերցողների մեկի` Էջմիածնի վետերանների խորհրդի նախագահ Սիրեն Եղիազարյանիՙ խմբագրությանը հասցեագրած նամակին, որտեղ նա ջերմ խոսքեր է հղել մեր թղթակից Արա Մարտիրոսյանին` փետրվարի 20-ի համարում երկու հրապարակումների («Որքա՞ն հարկեր են վճարել հանրության հայտնի օլիգարխները» եւ «Ինչո՞ւ են պապանձվել հայ գրանտակերները») առիթով: Առանց ներկայացնելու նամակի բովանդակության մանրամասները, պարզապես ցանկանում ենք շնորհակալություն հայտնել Սիրեն Ղազարյանին` մեր հրապարակումներին մշտապես հետեւելու եւ իր մոտեցումները հայտնելու համար: Հպարտ ենք, որ արժանանում ենք հերոսական անցյալ ունեցող սերնդի ներկայացուցչի` Հայրենական Մեծ պատերազմի մասնակցի նման գնահատանքին եւ պարտավորված` շարունակելու մեր երկրում եւ աշխարհում տեղի ունեցող իրադարձությունների օբյեկտիվ լուսաբանումն ու մեկնաբանությունները:
