Երկրի չեմպիոն Գյումրիի «Շիրակը» ձմռան նախապատրաստական շրջանում հավանաբար համալրվի գանացի ֆուտբոլիստներով: Վերջերս Գանա էր մեկնել ակումբի մարզական տնօրեն, «Շիրակի» նախկին ֆուտբոլիստ Արարատ Հարությունյանը, որը ներկա է գտնվել 8 երկրների մասնակցությամբ անցկացված մրցաշարին, ինչպես նաեւ դիտել է երկրի առաջնության հանդիպումները: Արարատ Հարությունյանը գանացի 6 ֆուտբոլիստի է ընտրել: Նրանք բոլորն էլ երիտասարդ ֆուտբոլիստներ են, մեկական հարձակվող ու պաշտպան, 4 կիսապաշտպան: Շուտով այդ ֆուտբոլիստները կժամանեն Գյումրի եւ փորձաշրջան կանցնեն «Շիրակի» կազմում:
Իսկ ահա «Շիրակի» ռմբարկու Սերժ Դեբլեն ամենայն հավանականությամբ կհեռանա թիմից: Նա մի շարք առաջարկներ ունի արտերկրից եւ արդեն հունվարին կարող է տեղափոխվել: Բորիս Կադիո Դիդիեն պետք է փորձաշրջան անցներ ղազախական «Կայսարում», սակայն վիզայի հետ կապված խնդիրներ ծագեցին ու նա մեկնեց հայրենիք: Եթե վիզայի հարցերը չկարգավորվեն, ապա Դիդիեն կմնա «Շիրակում»:
Նախապատրաստական շրջանում «Շիրակն» ուսումնամարզական հավաքներ կանցկացնիՙ ստուգելով ֆուտբոլիստների պատրաստվածության աստիճանը ստուգողական հանդիպումներում: Դրանցից մեկը նախատեսված է 2014-ի փետրվարի 8-ին Կալիֆոռնիա նահանգի Կարսոն քաղաքում, որտեղ «Շիրակն» ուժերը կչափի հանրահայտ «Լոս Անջելես Գելեքսիի» հետ:
