Ցուցադրությունը ներկայացնում է Մարտիրոս Սարյանի տարբեր տարիների ստեղծագործությունների ընտրանինՙ դիմանկարների, նատյուրմորտների եւ բնանկարների, ինչպես նաեւ ջրանկարների եւ գրքերի նկարազարդումների նմուշներ:
Մ. Սարյան տուն-թանգարանի եւ Մաշտոցյան Մատենադարանի համագործակցության շրջանակներում բացված ցուցահանդեսում ընդգրկված են կտավներՙ Մ. Սարյան տուն-թանգարանի, ինչպես նաեւ Սարյան ընտանիքի հաւաքածուից: Ի դեպ, Մ. Սարյան տուն-թանգարանի ամբողջ հավաքածուն, թանգարանի շենքի հիմնարար վերանորոգման աշխատանքների հետ կապված, ի պահպանություն հանձնված է Մատենադարանին, որտեղ արդիական նոր սարքավորումներով օժտված պահոցներում հանգրվանել են նկարչի կտավները:
Այս ցուցադրութիւննՙ անկասկած մեծ նվեր է ոչ միայն Մատենադարան այցելող հայ թե օտար զբոսաշրջիկների, այլեւ արվեստասեր լայն հասարակայնության համար:
Քաղաքակրթությունների հազարամյա խաչասերումների, մեծ մշակույթների դարավոր շփումների ու փոխհարստացման այն միջավայրում, որ ներկայացնում է Մատենադարանն իր նոր թանգարանային համալիրով ու ցուցադրություններով, Մարտիրոս Սարյանի կտավներն առավել կբացահայտվեն իրենց տարածական խորքով եւ վերժամանակյա խորհրդովՙ իբրեւ «Երկխոսություն հավերժի հետ»:
