Գեղանկարիչ Հենրիկ Սիրավյանը ծնվել է 1928 թ. Երեւանում: 1943-1948 թթ. ուսանել է Փ. Թերլեմեզյանի անվան գեղարվեստի ուսումնարանում, հետագայում` 1948-1954 թթ. ուսումը շարունակել Երեւանի Գեղարվեստաթատերական ինստիտուտի գեղանկարչության բաժնում: 1954 թ. մասնակցել է ցուցահանդեսների, 1956 թ-ից Հայաստանի նկարիչների միության անդամ է եղել:
Նկարիչը ստեղծագործել է ամենատարբեր ժանրերում` տուրք տալով առավելապես հայրենի եզերքի բնապատկերներին: 1950-ական թթ. 2-րդ կեսին ձեւավորվում էր խորհրդահայ մոնումենտալ-դեկորատիվ գեղանկարչությունը, որի վառ ներկայացուցիչներից էին ժամանակի երիտասարդ նկարիչներ Հ. Զարդարյանը, Վան Խաչատուրը եւ Հ. Սիրավյանը: 1958-1968 թթ. Սարյանի ղեկավարությամբ նկարիչն իրականացնում է «Հայաստան» (1966) եռապատկեր որմնանկարը Սունդուկյանի անվան պետական թատրոնի ճեմասրահում: 1962 թ. Սիրավյանը մասնակցում է պատմական «Հինգի ցուցահանդեսին» (Ա. Ղափանցյան, Լ. Բաժբեուկ-Մելիքյան, Ալ. Գրիգորյան, Մ. Ավետիսյան, Հ. Սիրավյան): Նույն` 1962 թ. Մրցանակի է արժանացել Մոսկվայում անցկացվող համամիութենական երիտասարդական ցուցահանդեսում «Լ. Բաժբեուկ-Մելիքյանի» դիմանկարի համար: Այս տարիներին ստեղծած որմնանկարներն ու ապակու վրա կատարված նկարները (վիտրաժները) զարդարում են Հայաստանի գրողների միության նախագահության ճեմասրահը, Էջմիածնի Գեւորգյան ճեմարանի Կոմիտասի թանգարանի գմբեթը (Հ. Հակոբյանի, Ա. Մելքոնյանի հետ) եւ այլն: 1977 թ. գեղանկարիչը ստանում է Հայաստանի վաստակավոր նկարչի կոչում:
Սիրավյանի հաստոցային աշխատանքների ճնշող մեծամասնությունը կազմում են` գյուղական, ճարտարապետական, լիրիկական, բայց մոնումենտալ, զուսպ բնանկարները, այլաբանորեն իմաստավորված թեմատիկ հորինվածքները:
Գեղանկարիչ Հենրիկ Սիրավյանի ծննդյան 85-ամյա հոբելյանին նվիրված հուշ- ցերեկույթը եւ ցուցահանդեսի բացումը տեղի կունենա Հայաստանի ազգային պատկերասրահում` այսօր, դեկտեմբերի 21-ին, ժ. 14.00-ին: Հուշ-ցերեկույթի շրջանակներում տեղի կունենա նաեւ «Սիրավ. Դու հավերժող իմ Հայաստան» տեսաֆիլմի պրեմիերան:
