Ֆուտբոլի Հայաստանի առաջնության մասնակից թիմերը դեռեւս արձակուրդում են, իսկ այդ ընթացքում ակումբների ղեկավարներն արդեն մտածում են կազմը համալրելու մասին: Առայժմ ամենակտրուկ քայլերը ձեռնարկում է առաջնության հետնապահ «Ալաշկերտը», որը 2-րդ շրջանի հանդիպումներին կներկայանա նոր կազմով:
Ինչպես տեղեկացանք ակումբի մամուլի ծառայությունից, միանգամից 9 ֆուտբոլիստի հետ պայմանագրերը երկկողմ համաձայնությամբ խզվել են: «Ալաշկերտից» հեռացել են դարպասապահ Էդվարդ Հովհաննիսյանը, թիմի ավագ Արա Հովհաննիսյանը, Բենիկ Հովհաննիսյանը, Ռազմիկ Հովհաննիսյանը, Ցոլակ Բեգլարյանը, Սուրեն Գալստյանը, Տիգրան Հախնազարյանը, Դավիթ Մինասյանը եւ Գարեգին Մաշումյանը:
Թիմի գլխավոր մարզիչ Արմեն Գյուլբուդաղյանցը ցանկանում է իր թիմում ընդգրկել Հովհաննես Գրիգորյանին, Նարեկ Դավթյանին, Արթուր Բարսեղյանին, Գեւորգ Օհանյանին, Աղվան Հայրապետյանին, Հայկ Իշխանյանին, Նորայր Գյոզալյանին եւ պատանի դարպասապահ Տրդատ Ասրյանին: Չի բացառվում, որ «Ալաշկերտը» համալրի փորձառու Աղվան Մկրտչյանը, որի հետ ներկայումս ակումբը բանակցում է: Նշենք, որ այս ֆուտբոլիստներից ոմանք Արմեն Գյուլբուդաղյանցի գլխավորությամբ հանդես են եկել «Իմպուլսում»: Նրանց թվում էր նաեւ նախորդ առաջնության լավագույն ռմբարկու Նորայր Գյոզալյանը, որը վերադարձել է Բելառուսից: Նա ցանկանում է կրկին ուժերը փորձել արտերկրում: Եթե չստացվի, ապա պատրաստ է հանդես գալ «Ալաշկերտում»: Իսկ «Ալաշկերտի» ներկայիս ռմբարկու Միհրան Մանասյանը պատրաստվում է փորձաշրջանի մեկնել արտերկիր:
Նոր մրցաշրջանի նախապատրաստությունն «Ալաշկերտը» կսկսի 2014-ի հունվարի 9-ից: Տեղում մարզվելուց հետո հունվարի 20-ին թիմն առաջին ուսումնամարզական հավաքի կմեկնի Թուրքիայի Բելեկ քաղաք, որտեղ մարզումները կշարունակվեն մինչեւ փետրվարի 3-ը: Մեկ շաբաթ անց «Ալաշկերտը» կրկին կմեկնի Բելեկՙ անցկացնելու երկշաբաթյա 2-րդ հավաքը:
