Արձակագիրը այսօր Գերմանիայից կտեղափոխվի Երեւան
Գրասեր հասարակությունը տագնապով սպասում է բարի լուրերիՙ Գերմանիայից, որտեղ վերջին երեք շաբաթներին վիրահատության եւ բուժման նպատակով գտնվում է մեր տաղանդավոր արձակագիր Լեւոն Խեչոյանը: Դժբախտաբար սփոփիչ լուրեր, տեղեկություններ դեռեւս չկան: Ընդհակառակը, սիրելի գրողի վիճակը մնում է ծանր, շատ ծանր: Վիրահատող բժիշկների հավաստմամբ, նրա մարմինը կրծող հիվանդությունը տարածված է եղել ներքին մի շարք օրգաններում, ու որոշվել է հետվիրահատական բուժման կուրսը շարունակել Երեւանում:
Այսօր Լեւոն Խեչոյանը կտեղափոխվի Երեւան եւ անմիջապես կհանձնվի բժիշկների հսկողությանը:
Մյուս կողմից, «Արմենպրես» լրատվական գործակալության հավաստմամբ, որն իր տեղեկությունները քաղել է ՀՀ առողջապահության աշխատակազմի ղեկավար Սուրեն Քրմոյանից, կառավարությունն արդեն անհրաժեշտ ֆինանսական աջակցությունը, շուրջ 20 հազար եվրոյին համարժեք դրամ, փոխանցել է Լ. Խեչոյանի հարազատներինՙ բուժման եւ տեղափոխման ծախսերը հոգալու համար:
