Ինչպես տեղեկացանք Երեւանի քաղաքապետարանի տեղեկատվության եւ հասարակայնության հետ կապերի վարչությունից, նոյեմբերին Երեւանում մեկնարկած աշնանային ծառատունկի հիմնական ծրագիրն ամբողջությամբ ավարտվել է: Մայրաքաղաքում ընդհանուր առմամբ տնկվել են շուրջ 20 հազար ծառ եւ 14000 թուփ: Ըստ այդմ, շուրջ 10 հազար ծառ եւ 14 հազար թուփ տնկվել են մայրաքաղաքի կանաչապատման ընկերությունների կողմից:
Ծառատունկն իրականացվել է բացառապես ոռոգելի տարածքներում: Տարեկան ծրագրով նախատեսված շուրջ 21 կմ ոռոգման նոր համակարգի անցկացմամբ ոռոգելի են դարձել նաեւ «Փարոս» անտառպուրակի, «Հաղթանակ» զբոսայգու եւ Կոմիտասի անվան զբոսայգու տարածքները, որտեղ եւս աշնանային ծառատունկ է իրականացվել: Երեւանը կանաչ տարածքներով համալրելու 2013 թվականի ծրագրի արդյունքում ընդհանուր առմամբ մայրաքաղաքի կանաչ մակերեսը կհասնի 850 հա-ի:
