Սպորտային մարմնամարզության Եվրոպայի առաջնության հենացատկի բրոնզե մրցանակակիր Արթուր Դավթյանը հիանալի ելույթ ունեցավ մոսկովյան մրցաշարումՙ արժանանալով արծաթե մեդալի: Մրցաշարը նվիրված էր խորհրդային անվանի մարմնամարզիկ, օլիմպիական խաղերի կրկնակի, աշխարհի բացարձակ եւ Եվրոպայի վեցակի չեմպիոն Միխայիլ Վորոնինի հիշատակին: Միջազգային այդ մրցաշարն անցկացվում էր արդեն 20-րդ անգամ:
Արթուր Դավթյանն իրեն գերազանց դրսեւորեց 23 երկրների ներկայացուցիչների հետ պայքարում: Արթուրը հանդես եկավ բազմամարտում եւ բոլոր 6 գործիքների վրա էլ բարձր արդյունքներ ցույց տալով, իրավունք ստացավ շարունակելու պայքարը մեդալների համար:
Հավաքականի գլխավոր մարզիչ Հակոբ Սերոբյանի ցուցումով հայ մարմնամարզիկը եզրափակիչ փուլում մասնակցեց միայն 3 գործիքների վրա վարժություններումՙ հենացատկ, նժույգաթափեր եւ օղակներ:
Վճռորոշ փուլում էլ Արթուր Դավթյանն իր բարձրության վրա էր: Հենացատկերում նա գրավեց առաջին տեղը, նժույգաթափերում ճանաչվեց 2-րդը, իսկ օղակի վրա վարժությունում ցույց տվեց 3-րդ արդյունքը: Ընդհանուր հաշվարկով Արթուր Դավթյանը բազմամարտում գրավեց 2-րդ տեղըՙ արժանանալով արծաթե մեդալի: Նա զիջեց միայն ռուսաստանցի Դմիտրի Գոգոտովին:
Մոսկովյան մրցաշարի երիտասարդների մրցավեճին մասնակցած Արսեն Գասպարյանը գրավեց 7-րդ տեղը:
