Հայաստանի պետական ֆիլհարմոնիկ նվագախմբի տարեվերջյան ծրագիրը կներառի մի քանի ուշագրավ իրադարձություններ:
Այսօր, դեկտեմբերի 6-ին, Արամ Խաչատրյան համերգասրահում Էդուարդ Թոփչյանի ղեկավարությամբ նվագախմբի հետ հանդես կգա աշխարհահռչակ բրիտանացի թավջութակահար Սթիվեն Իսերլիսը, ում մենակատարությամբ կկայանա Պրոկոֆեւի Թավջութակի կոնցերտի հայաստանյան պրեմիերան: Կարեւոր է նշել, որ լեգենդար թավջութակահարը նախորդ տարիներին բազմիցս հանդես է եկել ՀՊՖՆ-ի հետ Երեւանում, ինչը վկայում է Հայաստանի ֆիլհարմոնիկի հանդեպ երաժշտի տածած բարձր գնահատանքի եւ բարեկամական նվիրվածության մասին:
Ի նշան 1988 թ. Երկրաշարժի 25-ամյա տարելիցի` դեկտեմբերի 6-ի համերգը կմեկնարկի Երվանդ Երկանյանի «Միստերիա»-ի կատարմամբ: Երեկոյի ծրագրում ներառված է նաեւ Մուսորգսկու «Պատկերներ ցուցահանդեսից» ստեղծագործությունը:
Դեկտեմբերի 13-ին Հայաստանի Ֆիլհարմոնիկը կներկայացնի գերմանաբնակ դաշնակահարուհի Լուսինե Խաչատրյանի մենակատարությամբ համերգ` նվիրված Երեւանի Կոմիտասի անվան պետական կոնսերվատորիայի հիմնադրման 90-ամյակին: Դեկտեմբերյան ծրագիրը կամփոփվի հոբելյանական երեկոներով. դեկտեմբերի 18-ին եւ 23-ին կկայանան հանդիսություններ` ի պատիվ Բարսեղ Թումանյանի 55-ամյա եւ Հովհաննես Չեքիջյանի 85-ամյա հոբելյաններին:
