14-րդ տուրի հանդիպումներով ավարտվեց ֆուտբոլի Հայաստանի բարձրագույն խմբի առաջնության առաջին կեսը: Թիմերը մեկնում են արձակուրդ, որից հետո կսկսեն նախապատրաստվել մարտին վերսկսվող առաջնության 2-րդ կեսին:
Բարձր տրամադրությամբ առաջնության առաջին կեսին հրաժեշտ տվեցին արարատցիները, որոնք 14-րդ տուրում հյուրընկալել էին «Փյունիկին»: «Արարատը» դեռեւս նախորդ տուրում ապահովել էր 1-ին հորիզոնականը: «Փյունիկի» հետ խաղում էլ արարատցիներն իրենց լավ դրսեւորեցին եւ 2-0 հաշվով արժանի հաղթանակ տոնեցին: Դեռեւս առաջին խաղակեսում առաջնության լավագույն ռմբարկուներից մեկըՙ Գեւորգ Նռանյանը 2 անգամ գլխի հարվածով գրավեց մրցակցի դարպասը: Այդ հաղթանակի շնորհիվ «Արարատն» ավելի մեծացրեց միավորների տարբերությունն իրեն հետապնդող «Շիրակից»ՙ լուրջ հայտ ներկայացնելով չեմպիոնի տիտղոսը նվաճելու համար:
Իսկ ահա «Շիրակը» Գյումրիում չկարողացավ հաղթել «Միկային»ՙ բավարարվելով ոչ-ոքիով: Շիրակցիների կազմում կրկին ակտիվ էր Սերժ Դեբլեն, որն էլ 2-րդ խաղակեսի սկզբին բացեց հաշիվը: Սակայն շիրակցիներին չհաջողվեց զարգացնել հաջողությունը: Իսկ «Միկայի» գրոհներից մեկը դիպուկ հարվածով եզրափակեց Վարդգես Սաթումյանըՙ փրկելով թիմին պարտությունից: Նա վերջին 3 հանդիպումներում դաշտից չի հեռանում առանց գոլիՙ խփելով 4 գնդակ: Նախորդ տուրում էլ Սաթումյանի խփած 2 գոլերի շնորհիվ «Միկան» 2-1 հաշվով հաղթել էր «Ուլիսին»:
Անսպասելի էր «Բանանց»-«Ալաշկերտ» խաղում գրանցված գերխոշոր հաշիվըՙ 7-0: Արմեն Գյուլբուդաղյանցի գլխավորությամբ «Ալաշկերտը» կարծես թե սկսել էր կարգավորել խաղը: Սակայն «Բանանցի» հետ խաղում թիմի մեխանիզմում կարծես ինչ-որ բան խանգարվել էր: «Բանանցից» 2-ական գոլերի հեղինակներ դարձան Ռումյան Հովսեփյանն ու Գեւորգ Կարապետյանը, մեկական գնդակ խփեցին Ֆոֆանա Սեկուն, Արտակ Եդիգարյանն ու Կառլո Ստեֆանո Ռոդրիգեսը:
Իսկ ահա «Ուլիս»-«Գանձասար» խաղում դարպասները մնացին անառիկ:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 14 | 9 | 3 | 2 | 20-7 | 30 |
| 2. Շիրակ | 14 | 6 | 4 | 4 | 24-18 | 22 |
| 3. Գանձասար | 14 | 5 | 5 | 4 | 26-18 | 20 |
| 4. Բանանց | 14 | 4 | 7 | 3 | 18-11 | 19 |
| 5. Միկա | 14 | 4 | 7 | 3 | 16-14 | 19 |
| 6. Փյունիկ | 14 | 4 | 5 | 5 | 22-20 | 17 |
| 7. Ուլիս | 14 | 3 | 4 | 7 | 12-19 | 13 |
| 8. Ալաշկերտ | 14 | 2 | 3 | 9 | 15-46 | 9 |
Ռմբարկուները
| Գեւորգ Նռանյան | «Արարատ» | 9 |
| Սերժ Դեբլե | «Շիրակ» | 9 |
| Միհրան Մանասյան | «Ալաշկերտ» | 7 |
| Արտակ Դաշյան | «Գանձասար» | 7 |
| Ալեքսանդր Ռակիչ | «Արարատ» | 6 |
| Նարեկ Բեգլարյան | «Միկա» | 6 |
