Սերգեյ Փարաջանովի «Նռան գույնը» ֆիլմը ըստ մասնագետների, համաշխարհային կինոարվեստի գոհարներից մեկն է:
«Արմինյն միրոր-սփեքթեյթր» շաբաթաթերթի փոխանցմամբ, Համաշխարհային կինոֆոնդը որոշում է կայացրել վերականգնել ֆիլմը, որպեսզի այն ցուցադրվի առաջիկա տարի Կաննի միջազգային կինոփառատոնի օրերին:
Փարաջանովը միջազգային կինոքննադատների ուշադրությանը արժանացավ հատկապես «Մոռացված նախնիների ստվերները» ֆիլմը նկարահանելուց հետո: Այն արտասահմանում հայտնի է «Հրեղեն վայրի ձիերը» (Wild Horses of Fire) անունով: Դրանից առաջ նկարահանված ֆիլմերը (1954-1964) նա «սովորական աղբ» է համարել: Վերջին տարիներին նա զբաղված է եղել «Խոստովանություն» ինքնակենսագրական ֆիլմի աշխատանքներով, որը թողել է անավարտ մահվան պատճառով: Փարաջանովը վախճանվել է 1990 թվի հուլիսի 20-ին Հայաստանում, 66 տարեկանում:
Անավարտ ֆիլմը ի մի է բերել իր մտերիմ ընկեր Միխայիլ Վարդանովը 1992-ին «Փարաջանով: Վերջին գարունը» վերնագրով: 2010-ին Հոլիվուդում հիմնվել է Փարաջանով-Վարդանով ինստիտուտը, որի նպատակն է պահպանել եւ սերունդներին հանձնել Փարաջանովի եւ Վարդանովի ժառանգությունը:
