Հեսսենի երկրամասի Բերգշտրասսե շրջանի ղեկավար Մաթթիաս Վիլկեսն իր նստավայրում ընդունել է Լեռնային Ղարաբաղի վարչապետ Արայիկ Հարությունյանի գլխավորած պատվիրակությանը, որ երկրամասում էր պատասխան այցով, իրազեկում է տեղական «Բյուրշթեդթեր ցայթունգը» հոկտեմբերի 31-ինՙ Ուվե Դիիթրիխի «Քաղաքական մեկուսացման ծանրությունը» վերնագրյալ անդրադարձում: Ապրիլին Վիլկեսը ԳԴՀ-ում ՀՀ պատվո հյուպատոս Սթիվեն Բրայան Ֆերայի ընկերակցությամբ եղել էր Հայաստանում եւ Արցախում, լավ տպավորություն ստացել Ստեփանակերտի համալսարանից, որի գրադարանը գերմաներեն ուսումնական ձեռնարկներով խոստացել էր հարստացնել: Վարչապետ Հարությունյանը թարգմանչի միջոցով ներկայացրել է իր կառավարածՙ միջազգային հանրության կողմից դեռեւս չճանաչված երկրի վիճակը: Ներքին խնդիրներին ավելանում է քաղաքական եւ տնտեսական մեկուսացումը, որի լուծումը միջազգային հանրության պատասխանատվությանն է վստահված:
Լեռնային Ղարաբաղի Հանրապետությունը հիմնվել է ԽՍՀՄ փլուզման ընթացքում: Կառավարությունը հետամուտ է, որ իր վարած հավասարակշիռ քաղաքականությունը լինի միջազգային իրավունքի հիմնարար նորմերին համապատասխան, հետեւողականՙ Հարավային Կովկասում խաղաղության եւ կայունության պահպանման հարցում: Երկրի քրիստոնեական դրոշմը, աշխարհում ամենահին քրիստոնեական վանքն այստեղ առանձահատուկ հպարտության զգացումով են համակում: Ապագայի հայացքը թե տնտեսական, թե քաղաքական ասպարեզում դրական, աշխարհի համար բաց հեռանկար ունի, թեպետ պարզորոշ չէ, թե հարեւան Ադրբեջանի հետ հակամարտությունը ինչքան կտեւի: Հայերով բնակեցված ԼՂՀ-ի միջազգային ճանաչումն անկասկած ծառայելու է տարածաշրջանում կայունության եւ երկարատեւ խաղաղության պահպանմանը: Այդօրինակ հասարակական կառուցվածքներ կերտելու ձգտումը քաղաքական, տնտեսական, մշակութային, գիտական, հումանիտար ասպարեզներում արժեքավոր է հատկապես Եվրոպայի հետ համագործակցության զարգացման արդյունքում, գրում է գերմանական լրատուն:
ԼՂՀ վարչապետին ուղեկցել են ՀՀ ԱԺ պատգամավոր Վահան Հովհաննիսյանը, Բեռլինում ԼՂՀ ներկայացուցիչ Հարություն Գրիգորյանը:
