Բիլբաոյում անցկացված շախմատի «Մեծ սաղավարտի» 6-րդ մրցաշարն ավարտվեց Լեւոն Արոնյանի հաղթանակով: Առաջին շրջանում բոլոր 3 պարտիաներն էլ ավարտելով ոչ-ոքի, Լեւոնը վերելքով խաղաց 2-րդ շրջանում: Մաքսիմ Վաշիե-Լագրավին հաղթելուց հետո Լեւոնը կարեւոր հաղթանակ տոնեց նաեւ Մայքլ Ադամսի հետ մրցավեճում, իսկ ավարտական տուրում գլխավոր մրցանակը նվաճելու համար հայ գրոսմայստերին բավարարեց նույնիսկ ոչ-ոքին Շահրիյար Մամեդյարովի հետ:
Արոնյանը 6 պարտիաներում վաստակեց 10 միավորՙ տոնելով 2 հաղթանակ, 4-ն ավարտելով ոչ-ոքի: 9 միավորով 2-րդ տեղը գրավեց Մայքլ Ադամսը: Մամեդյարովն ու Վաշիե-Լագրավը 5-ական միավոր վաստակեցին ու բաժանեցին 3-4-րդ տեղերը:
Լեւոն Արոնյանը «Մեծ սաղավարտի» մրցաշարերում 2-րդ անգամ հաղթող ճանաչվեց: Առաջին անգամ նա հաջողության էր հասել 2009-ին: Իր թվիթերյան էջում Լեւոն Արոնյանը հետեւյալն է նշել. «Ինչ հիանալի շաբաթ էր Հայաստանի համար: Ես դարձա Բիլբաոյի «Մեծ սաղավարտի» հաղթող, մեր ֆուտբոլի ազգային հավաքականը հաղթեց բուլղարացիներին, իսկ իմ հայրենի քաղաք Երեւանը նշեց իր 2795-ամյակը»:
Բիլբաոյում տոնած հաղթանակի շնորհիվ Լեւոն Արոնյանն իր վարկանիշն ավելացրեց 6,4-ով եւ կրկին հատեց 2800-ի սահմանագիծը: Ներկա պահին նրա ընթացիկ վարկանիշը 2801,4 է, ինչի շնորհիվ Արոնյանը շրջանցեց Վլադիմիր Կրամնիկին ու տեղ զբաղեցրեց 2-րդ հորիզոնականում:
