ԳԱՐԻԿ ԱՎԵՏԻՍՅԱՆ
Այս օրերին Մոսկվայում տեղի է ունենում «Երեք հարյուր վաթսուն աստիճան» արդի գիտական ֆիլմերի երրորդ միջազգային փառատոնը, որի ժյուրին կնախագահի Հայաստանի ժողովրդական արտիստ, կինոռեժիսոր Հարություն Խաչատրյանը: Այս մասին Panorama.am-ին տեղեկացրել են «Ոսկե ծիրան» փառատոնի մամուլի ծառայությունից:
«Սա հրաշալի առիթ է «Ոսկե ծիրան» եւ «Երեք հարյուր վաթսուն աստիճան» միջազգային կինոփառատոների փոխհարաբերությունների ամրապնդման եւ մոտ ապագայում համատեղ ծրագրերով ներկայանալու համար»,- համոզված են «Ոսկե ծիրան» փառատոնի կազմակերպիչները:
«Երեք հարյուր վաթսուն աստիճան» փառատոնն անց է կացվում Մոսկվայի կառավարության հովանու ներքո: Առաջնային նպատակն է գիտության եւ գիտական աշխատանքի վերաբերյալ հեղինակային վավերագրական ֆիլմերի հավաքագրումն ու ներկայացումը: Փառատոնի չորս մրցութային ծրագրերում ընդգրկված ֆիլմերը վավերագրական պատմություններ են` գիտություն-իրականություն, գիտություն-կյանք շղթայական փոխհարաբերությունների եւ անհատների կենսակերպի վերաբերյալ: Հազարավոր կինոփառատոներով հարուստ ժամանակակից կինոաշխարհում` իր ուրույն ուղղվածությամբ առանձնացող այս փառատոնն արդեն իսկ մեծ հեղինակություն է վայելում մասնագետների եւ հանդիսատեսների շրջանակներում:
