Լավրովը համամտություն է հայտնում, Դամասկոսըՙ հետաքրքրություն
Քանի դեռ դիվանագիտությունը աշխատում է, ուրեմն դեռեւս հույս կա, որ թնդանոթները չեն որոտա: Վաշինգտոն-Մոսկվա դիվանագիտական ջանքերը երեկ կարծես առաջին պտուղները տվեցին: Առավոտյան ԱՄՆ պետքարտուղար Ջոն Քերրին հայտարարեց, որ Սիրիան կարող է խուսափել ռազմական հարվածներից, եթե մեկ շաբաթվա ընթացքում ամբողջ քիմիական զենքի վերահսկողությունը փոխանցի միջազգային ընկերակցությանը: Այդ մասին հաղորդեց Ռոյթեր գործակալությունը:
Քերրիի խոսքերովՙ ԱՄՆ-ի ղեկավարությունը լիովին գիտակցում է, որ Սիրիայի հակամարտության լուծումը բացառապես քաղաքական ոլորտում է: «Ռազմական ուղի այստեղ պարզապես չկա. այս առումով մենք պատրանքներ չունենք», հայտարարել է պետքարտուղարը իր բրիտանացի պաշտոնակից Ուիլյամ Հեյգի հետ բանակցելուց հետո: Ընդսմին Քերրին ենթադրություն է արել, թե Սիրիայի նախագահ Բաշար Ասադը դժվար թե համաձայնի կատարել այդ պայմանը:
Հեյգը իր հերթին հավաստել է, որ Վաշինգտոնը տվյալ հարցում կարող է ակնկալել Լոնդոնի լիակատար դիվանագիտական աջակցությունը:
Օրվա երկրորդ կեսին, արդեն Մոսկվայում, ուր ժամանել էր Սիրիայի արտգործնախարար Մուալլիմը, համատեղ ասուլիսում Ռուսաստանի արտգործնախարար Սերգեյ Լավրովը, պատասխանելով Քերրիի առաջարկած պայմանի վերաբերյալ լրագրողի հարցին, հայտարարեց, որ Մոսկվան համամիտ է, որ սիրիական քիմիական զինանոցը դրվի միջազգային վերահսկողության տակՙ եթե դա է Սիրիան չհարվածելու պայմանը: Նա պատրաստակամություն հայտնեց համոզելու սիրիական կողմին: Դամասկոսը, իր հերթին «հետաքրքրական» գտավ առաջարկը:
Փոխադարձ հայտարարություններից հետո սիրիական ճգնաժամի մասին արտահայտվեց նաեւ ՄԱԿ-ի գլխավոր քարտուղար Բան Կի Մունը, առաջարկելով որ Դամասկոսը միջազգային վերահսկողության զոնաներ ստեղծի Սիրիայում, որտեղ կոչնչացվեն այդ զենքերը:
Հիշեցնենք, որ Սիրիան այն 7 երկրների շարքում է, որոնք միջազգային վերահսկողության չեն ենթարկել իրենց քիմիական զինանոցը:
