ՀՀ վարչապետ Տիգրան Սարգսյանի, «Ռուսական երկաթուղիներ» ԲԲԸ նախագահ Վլադիմիր Յակունինի, Շիրակի մարզպետ Ֆելիքս Ցոլակյանի եւ այլ բարձրաստիճան հյուրերի մասնակցությամբ մայիսի 28-ին Գյումրիում տեղի ունեցավ նորոգված վագոնային-վերանորոգման եւ լոկոմոտիվային դեպոների հանդիսավոր բացումը:
«Հարավկովկասյան երկաթուղի» ՓԲԸ-ն, որը 2008 թվականից ստանձնել է հայկական երկաթուղիների կոնցեսիոն կառավարումը, Գյումրու լոկոմոտիվային դեպոյի վերակառոցման համար ներդրել է 93,5 մլն ռուբլի, եւս 48,4 մլն ռուբլի ուղղվել է շարժակազմի նորոգման տեխնոլոգիական սարքավորումների ձեռքբերմանը: Էապես թարմացվել է դեպոյի սարքավորումների համակազմը. գնվել է 25 միավոր հիմնական եւ 6 միավոր ախտորոշման սարքավորում: Համապատասխան ծախսեր են կատարվել նաեւ վագոնային-վերանորոգման դեպոյի վերակառուցման, նորոգման սարքավորումների գնման համար:
Վարչապետ Տիգրան Սարգսյանը , Վլադիմիր Յակունինը , գնահատելով կատարված աշխատանքները, կարեւորեցին դրանց դերը լոկոմոտիվային եւ վագոնային-վերանորոգման դեպոների աշխատանքի որակի բարելավման, հայկական երկաթուղու արդյունավետ ու անվտանգ երթեւեկության ապահովման գործում:
Տ. Սարգսյանը եւ Վ. Յակունինը տվեցին լոկոմոտիվային դեպոյի աշխատանքների խորհրդանշական մեկնակը, նաեւ դեպոյի բակում եղեւնիներ տնկեցին:
