Փետրվարի 2-ին, 100 տարեկանում վախճանվել է ֆրանսիացի կաթոլիկ բենեդիկտյան վանական, գիտնական, եկեղեցու պատմաբան, արեւելագետ, հայագետ, թարգմանիչ Շառլ Ռենուն: Նա ծնվել էր 1925-ի ապրիլի 30-ին, 1948 թվականին միջնակարգ դպրոցն ավարտելուց հետո ընդունվել է Օտ-Կալակի Բենեդիկտյան աբբայություն եւ ձեռնադրության ժամանակ ստացել Աթանաս անունը: Օտ-Կալակի աբբայությունում եւ Թուլուզի կաթոլիկ ինստիտուտում ուսումնասիրել է ասորերեն, հայերեն եւ վրացերեն: 1956-1958 թթ. Ռենուն ուսումը շարունակել է Փարիզի կաթոլիկ ինստիտուտում եւ Սորբոնի բարձրագույն դպրոցում, որտեղ ուսումնասիրել է արեւելյան քրիստոնեություն, աստվածաշնչյան գրականություն, պատրիարքական հայրապետություն եւ պատարագի ժամերգություն: Փարիզի կաթոլիկ ինստիտուտում պաշտպանել է դոկտորական թեզ «Երուսաղեմի Ճաշոցը (թարգմանություն ֆրանսերեն եւ մեկնաբանություններ)» թեմայով, իսկ Սորբոնի համալսարանում արժանացել է դիպլոմի՝ «Եփրեմ Մծբնացու ասորերեն քարոզը Նիկոմեդիայի մասին (ասորերեն հատվածների եւ հայերեն բնագրի թարգմանությունը ֆրանսերեն)» հրատարակման համար: 1965-1990 թվականներին աշխատել է Ֆրանսիայի Գիտական հետազոտությունների ազգային կենտրոնում, որտեղ ստացել է «Գիտական հետազոտությունների դոկտորի 2-րդ կարգի» աստիճան: Եվրոպայի գիտական մամուլում հրատարակել է ֆրանսերեն, իտալերեն, անգլերեն եւ գերմաներեն հայագիտական (նաեւ վրացագիտական եւ աղվանագիտական) աշխատություններ՝ նվիրված Հայ եկեղեցու ծիսական գրականությանը (մասնավորապես՝ Ժամագրքին եւ Ճաշոցին), Հայ եկեղեցու տոներին, պատարագին, հայերեն ձեռագրերի, առանձին հեղինակների (Դավիթ Քոբայրեցի, Աթանաս Ալեքսանդրացի) եւ այլ թեմաների մասին:
Ա. Բ.
