Սարդինիայի մայրաքաղաք Կալյարիում «Ջուզեպպե Սիոտտո» հիմնադրամի նախաձեռնությամբ ապրիլի 14-17-ին կայացել է «Երաժշտություն եւ պատմություն» փառատոնը: Ապրիլի 16-ին փառատոնի շրջանակներում ներկայացվել է «Սոնյա Օրֆալյանի նոթատետրը», որն ընթերցել է Լիա Կարեդդուն՝ Իրմա Թուջյանի դաշնամուրի նվագի ուղեկցությամբ: Այս թատերական գործում հայերի երկու սերունդների ներկայացուցիչներ քննարկում են ընթրիքի հրավեր կազմակերպելու հարցերը՝ հընթացս ներկայացնելով նաեւ հայության տարբեր խնդիրները:
Իտալագիր արձակագրուհի եւ նկարչուհի Սոնյա Օրֆալյանը ծնվել է 1958-ին, Լիբիայում, 1960-ականների վերջից բնակվում է Հռոմում: Նա հրատարակել է մի քանի հատոր, այդ թվում՝ «Հայաստանի խոհանոցը: Ուղեւորություն դեպի ժողովրդի խոհարարական մշակույթ», «Կար ու չկար. հեքիաթներ Հայաստան երկրից», «Քամուն հեծած. Հայաստանի հեքիաթները», իսկ անցյալ տարի ֆրանսերեն թարգմանությամբ լույս է տեսել Օրֆալյանի «Հայաստանի երեխաների խոսքերը» («Գալիմար» հրատարակչություն): Օրֆալյանը նաեւ մի շարք թատերախաղերի հեղինակ է, որ մեկնաբանել են իտալացի եւ ֆրանսիացի դերասաններ:
Դաշնակահարուհի եւ երգահան Իրմա Թուջյանը ծնվել է Լիբանանում, երաժշտական կրթությունն ստացել է Փարիզում: 1990 թվականից ապրում է Կալյարիում: Թողարկել է իր երաժշտական ստեղծագործությունների եւ դաշնամուրային կատարումների հինգ ձայնասկավառակ՝ «Դիմանկարներ» (2005), «Երթ անապատում» (2008), «Ուշադրություն» (2011), «Համոզվածություն» (2017) եւ «Ակն» (2006): Վերջինն ընդգրկում է բազմաթիվ գործեր Կոմիտասից եւ Գյուրջիեւ-դե Հարթմանից:
Ա. Բ.
