2022թ. սեպտեմբերի 23-24-ին Գյումրիում տեղի ունեցավ «Շիրակի պատմամշակութային ժառանգությունը. հայագիտության արդի հիմնահարցեր». խորագրով միջազգային 11-րդ գիտաժողովը: Այն նվիրված էր ՀՀ Գիտությունների ազգային ակադեմիայի Շիրակի հայագիտական հետազոտությունների կենտրոնի հիմնադրման 25-ամյա հոբելյանին:Գիտաժողովի կազմակերպմանն աջակցել են ՀՀ նախագահ Վահագն Խաչատուրյանը, ՀՀ ԳԱԱ նախագահ Աշոտ Սաղյանը եւ Շիրակի մարզպետարանը:
Գիտաժողովին մասնակցեցին գիտնականներ Հայաստանից, Ռուսաստանից, Հունաստանից, Մեծ Բրիտանիայից, Չեխիայից, Էստոնիայից, Վրաստանից, Ղազախստանից: Մասնակիցներն իրենց խոնարհումը բերեցին Ադրբեջանի վերջին ագրեսիայի հետեւանքով զոհված հայորդիների հիշատակին:
Ակադեմիկոս Յուրի Սուվարյանը կարեւորեց Շիրակի հայագիտական հետազոտությունների կենտրոնի նշանակությունը հայագիտության զարգացման գործում: Մարզպետ Նազելի Բաղդասարյանն ընդգծեց կենտրոնի դերը եւ նման գիտական միջոցառումների կազմակերպումը երիտասարդ հայագետների պատրաստման գործում: Մակա Բերիձեն կարեւորեց Սամցխե-Ջավախեթիի պետական համալսարանի եւ Շիրակի հայագիտական հետազոտությունների կենտրոնի միջեւ համագործակցությունը:
Գիտական նստաշրջանները նվիրված էին «Հնագիտություն եւ վիմագրություն», «Պատմագիտություն», «Ազգաբանություն», «Արվեստաբանություն եւ ճարտարապետություն», «Լեզվաբանություն եւ գրականագիտություն» թեմաներին: Ներկայացվեցին ավելի քան 100 զեկույցներ:
Գիտաժողովի ժամանակ կնքվեցին համագործակցության հուշագրեր ՀՀ ԳԱԱ Շիրակի հայագիտական կենտրոնի եւ ՌԴ Հարավային դաշնային համալսարանի Սոցիոլոգիայի եւ տարածաշրջանային հետազոտությունների ինստիտուտի հայագիտության կենտրոնի եւ Ղազախստանի Գիտության կոմիտեի Մարգուլաեւի անվան հնագիտության ինստիտուտի միջեւ:
Ստեփան ՊԱՊԻԿՅԱՆ
