Արխիվային ֆիլմերի մոսկովյան երկրորդ միջազգային փառատոնում նոյեմբերի 18-ից 27-ը ներկայացվելու է «Կինոմայրաքաղաք. Երեւան» առանձին ծրագիրը: Ինչպես գրում է ծրագրի համակարգող, ճանաչված կինոգետ եւ կինոքննադատ Եվգենի Մարգոլիտը՝ «առաջատար վարպետների՝ Հ. Մալյանի, Ֆ. Դովլաթյանի, Է. Քեոսայանի, Կ. Գեւորգյանի եւ ուրիշների՝ անկրկնելի ինտոնացիաներ պարունակող աշխատանքների միջոցով մենք ուզում ենք հետեւել, թե ինչպես է անցած հարյուրամյակում փոփոխվել Հայաստանի հինավուրց մայրաքաղաքի կերպարը»: Ծրագիրը նախատեսվում է ավարտել ժամանակակից հայ ռեժիսոր Արման Չիլինգարյանի «Լույսի կաթիլներ» ֆիլմով, որը 2021-2022 թթ. մասնակցել է տասից ավելի միջազգային կինոփառատոների եւ դարձել դրանցից ոչ պակաս, քան կեսի դափնեկիրը: Այն ներկայացնում է սրտառուչ սիրո մի պատմություն, որը ծավալվում է 90-ականների սկզբի սառած, հաճախակի հոսանքազրկվող Երեւանում:
Բացի այդ, ծրագրի շրջանակներում ցուցադրվելու են եւս հինգ ֆիլմեր՝ «Հայրիկ» (1972, ռեժ.՝ Հ. Մալյան), «Այստեղ, այս խաչմերուկում» (1974, ռեժ.՝ Կ. Գեւորգյան), «Տղամարդիկ» (1972, ռեժ.՝ Է. Քեոսայան), «Առաջին սիրո երգը» (1958, ռեժ.՝ Լ. Վաղարշյան, Յու. Երզնկյան) եւ «Երեւանյան օրերի խրոնիկա» (1972, ռեժ.՝ Ֆ. Դովլաթյան): Բոլոր ֆիլմերը ներկայացնելու է Եվգենի Մարգոլիտը:
Արխիվային ֆիլմերի մոսկովյան միջազգային փառատոնը «Բելիե ստոլբի» փառատոնի իրավահաջորդն է: Այն 1997 թվականից կազմակերպում է Ռուսաստանի պետական կինոֆոնդը՝ կինոքննադատներին եւ կինոսերներին Ռուսաստանի ամենամեծ եւ աշխարհում ամենակարեւորներից մեկը հանդիսացող հավաքածուի հետ ծանոթացնելու նպատակով: Ֆիլմերի մեծ մասը ցուցադրվելու է բնօրինակի լեզվով՝ ռուսերեն ենթագրերով:
«Աշխարհի կինոմայրաքաղաքները» փառատոնի մշտական շարքերից է. անցյալ տարի ընտրված էր Վիեննան, հաջորդ տարի ծրագրվում է Սանկտ-Պետերբուրգը:
ԱՇՈՏ ԳՐԻԳՈՐՅԱՆ
