Կիպրական «Սայփրըս մեյլը» տեղեկացնում է, որ մարտի 18-ին Նիկոսիայի «Ա. Գ. Լեւենտիս» ցուցասրահում կկայանա «Հայեր. թաքնված տատիկները» («Հիշողությունը երակների միջով») լիամետրաժ վավերագրական ֆիլմի ցուցադրությունը: Կինոնկարի ռեժիսոր Ալեքսանդրա Ռուտյո Միքայելյանը հետեւում է ճանապարհը ֆրանսահայ մի կնոջ, որը խոստացել էր պապին՝ գտնել Թուրքիայում մնացած իրենց հարազատներին: Այս որոնումը բացահայտում է թուրքական հասարակության մեջ խոր արմատներ ունեցող տաբուն՝ «թաքնված հայերի» կամ «սրի մնացորդների» պատմությունը, որոնք Ցեղասպանության տարիներին բռնի մահմեդականացվել եւ ձուլվել են: Ֆիլմն առաջին անգամ հանրությանն է ներկայացնում այդ կանանց՝ «հայ տատիկների» լռությամբ փոխանցված հիշողությունները:
Ալեքսանդրա Ռուտյո Միքայելյանը գրող, բեմադրիչ եւ արտադրիչ է: Ֆրանսիայի ազգային հեռուստաալիքներում տասը տարի լրագրող աշխատելուց հետո ուսանել է Լա Ֆեմիստ կինոդպրոցում: Որպես վավերագրող՝ իր ստեղծագործական ուշադրությունը կենտրոնացնում է հայ սփյուռքի հիշողության վրա՝ այն դիտարկելով որպես կինոթերապիայի ձև, որտեղ խաչվում են ընտանեկան պատմություններն ու համաշխարհային պատմությունը: Զգացմունքներից անդին՝ նրա կինոն ձգտում է միավորել մարդկանց եւ կամուրջներ կառուցել ժողովուրդների միջեւ:
Ա. Բ.
