Հուլիսի 22-ին վառվելու է Համահայկական ամառային 8-րդ խաղերի ջահը: Օգոստոսի 5-ին մեկնարկելիք Խաղերի բացումը, ինչպես հայտնի է, նախատեսված է Գյումրիում: Նախապատրաստական աշխատանքների ընթացքի վերաբերյալ Շիրակի մարզպետարանում, Համահայկական խաղերի համաշխարհային կոմիտեի նախագահ Իշխան Զաքարյանի գլխավորած պատվիրակության մասնակցությամբ կայացած աշխատանքային խորհրդակցության ժամանակ նախնական տվյալներ հրապարակվեցին այդ մարզատոնի, մասնակիցների կազմի ու թվի վերաբերյալ:
8-րդ խաղերի մի կարեւոր առանձնահատկությունը կլինի դրանց անցկացումը հանրապետության մարզերում: Մասնակցության հայտերի ընդունման վերջնաժամկետը հուլիսի 15-ն է, որից հետո տեղի է ունենալու մրցումների վիճակահանությունը: Այս պահի տվյալներով, ամենամեծ պատվիրակությունը կժամանի Ռուսաստանից՝ 18 քաղաքից մոտ 430 մասնանկից, այնուհետեւ Թուրքիայից՝ 5 քաղաքից 374 մասնակից, Վրաստանից՝ 7 քաղաքից 301 մասնակից, ԱՄՆ-ի 10 քաղաքից կժամանի 247, Ֆրանսիայից՝ 180 մասնակից, պատվիրակություններ կլինեն Արգենտինայից, Ավստրալիայից, Լիբանանից, Եգիպտոսից: Մինչեւ այժմ գրանցված մարզիկների թիվը, Հայաստանի մասնակիցների հետ միասին, արդեն հասնում է 5500-ի:
Խորհրդակցության ժամանակ քննարկվել են խաղերի անցկացմանն ու մասնակիցների կեցությանը, նրանց սպասարկմանն ու ապահովմանն առնչվող այլեւայլ հարցեր: Դրանց համակարգման նպատակով առաջիկա օրերին կձեւավորվի նաեւ մարզային կազմակերպչական շտաբ:
Գ. Մ.
