Իսրայելը Գազայում թիրախավորել է քրիստոնեական եկեղեցիները, սպանում է քրիստոնյաներին

Հոկտեմբերի 7-ին Գազայի հատվածում Իսլամական դիմադրության շարժման՝ ՀԱՄԱՍ-ի եւ իսրայեական պաշտպանության բանակի միջեւ սկսած ռազմական բախումները Իսրայելի նախաձեռնությամբ տարածվեցին Անդրհորդանանի՝ Պաղեստինի ինքնավարության տարածքում: Ռազմական գործողությունների աշխարհագրության ընդարձակումը բոլորովին  չարդարացրեց ՀԱՄԱՍ-ին Գազայում արմատախիլ անելու, պաղեստինցիներին հիմնովին հաշվեհարդարի ենթարկելու հրեական պետության մարտավարությունը: Թեեւ Իսրայելը կրկին հիմնահատակ ավերեց Գազայի գլխավորությամբ Պաղեստինի քաղաքները, սպանեց մոտ 20 հազար պաղեստինցի, նորածին մանուկները ներառյալ, խրվեց ճահճի մեջ: Թվում է, թե հիմա նրա առաջնահերթ խնդիրը «պատվավոր» նահանջն է: Բայց ինչպե՞ս:

Կարծես  հարցի պատսխանը Իսրայելն էլ չգիտի: Սակայն Գազայում ՀԱՄԱՍ-ի դեմ սանձազերծված, ապա, վերաճելով լայնամաշտաբ պատերազմի, ողջ Պաղեստինն ընդգրկած  ռազմական գործողությոններից առաջ արդեն հայտնի էր, որ ՀԱՄԱՍ-ը Իսրայելին հաղթել չի կարող, բայց չի էլ պարտվի: Գալով Արեւմտյան ափի պաղեստինցիներին, ապա նրանց էլ բնութագրել է Գազայում բնակվող մի  կին, ասելով. «Մենք երկրագնդի վրա կենդանի նահատակներ ենք, պատրաստ զոհաբերելու մեր զավակներին հանուն Պաղեստինի»: Նա այս խոսքերով, իր երեխաներին փլատակների տակ կորցնելուց հետո, ինչպես դեկտեմբերի 20-ին նշել է թուրքական  timeturk.net  կայքը, փորձել է մխիթարել ամուսնուն:

Ինչպես երեւում է՝ հաշվեհարդարի առումով Իսրայելը սոսկ մահմեդական պաղեստինցիներով չի սահմանափակվում, այլեւ Գազայում թիրախավորում է նաեւ քրիստոնեական եկեղեցիները: Դեկտեմբերի 16-ին իսրայելական զորքերը, պատճառաբանելով, թե տարածքում տեղակայված են ՀԱՄԱՍ շարժման գրոհայիններ, գնադակոծել են Գազայի Սբ. Ընտանիք Կաթոլիկ եկեղեցին, մինչդեռ Իսրայելի հարձակումներից փրկվելու համար այնտեղ դեռեւս հոկտեմբերի 7-ին ապաստանել էին Գազայի քրիստոնյաները:

Նշվել էր, որ հրետակոծության հետեւանքով եկեղեցում իր դստեր հետ սպանվել է մայրը, 7 հոգի վիրավորվել: Այնուհետեւ, սակայն, պարզվեց, որ սպանությունը իսրայելցի դիպուկահարներն են կատարել եւ սպանված մայրն ու դուստրը՝ Նադիհա Հալիլ Անտոնն ու Սամար Քամալ Անտոնը Անգլիայի խորհրդարանի Ներկայացուցիչների պալատի առաջին պաղեստինցի պատգամավոր Լեյլա Մորանի ազգականներն են: Մորանը ելույթ ունենալով խորհրդարանում, ըստ թուրքական մամուլի, ասել է, որ եկեղեցում ապաստանածներից ոչ մեկը որեւէ առչություն չունի ՀԱՄԱՍ-ի հետ, նրանք միանձնուհիներ են, որբեր եւ հաշմանդամներ: Այնուհետեւ նա շարունակել է. «Եկեղեցու դռան առջեւ տանկեր են, իսկ շուրջը՝ զինվորներ ու դիպուկահարներ, սպանում են նրանց, ովքեր դուրս են գալիս շենքից»:

Դատապարտելով Նահիդա եւ Սամար Անտոնի սպանությունը, Հռոմի Ֆրանցիսկոս պապն ասել է, որ Իսրայելի բանակը Գազայում թիրախավորում է քրիստոնյաներին եւ քրիստոնեական եկեղեցիներին, ավելացնելով. «Նահիդա Հալիլ Անտոնին իր դստեր՝ Սամարի հետ իսրայելցի դիպուկահարներն են սպանել, ոմանք ասում են. «Սա ե՛ւ ահաբեկչություն է, ե՛ւ պատերազմ: Ոչ, սա պատերազմ չէ, այլ ահաբեկչություն»: Սպանությունը դեկտեմբերի 17-ին հաղորդագրությանբ դատապարտել է նաեւ Երուսաղեմի հունաց պատրիարքարանը:

Ավելին, Գազայում միայն վերոհիշյալ կաթոլիկ եկեղեցին չի թիրախավորվել. իսրայելական զորքերի հարձակման է ենթարկվել նաեւ Գազայի հարավում Ազ-Զեյթուն թաղամասի հունական  Porphyrius  եկեղեցին: Մինչ իսրայելական բանակը հրթիռակոծում է քրիստոնեական եկեղեցիները եւ սպանում Գազայի քրիստոնյաներին, Իսրայելի պատասխանատու գործիչները անամոթաբար հայտարարում են, որ Գազայում ո՛չ քրիստոնյա բնակչություն կա, ո՛չ էլ քրիստոնեական եկեղեցի:
 
ՀԱԿՈԲ ՉԱՔՐՅԱՆ

Թուրքագետ