Չարենցի անվան գրականության եւ արվեստի թանգարանը եւ «Գրական հայրենիք» ՓԲԸ-ը (նույն ինքը՝ «Հայաստան» հրատարակչություն) հետ համատեղ լույս է ընծայել «Ժամանակակիցները Համո Բեկնազարյանի մասին» ժողովածուն: Այն տակավին 1980-ականների վերջին կազմել էր թանգարանի կինոյի բաժնի հիմնադիր վարիչ, երջանկահիշատակ Վիլենա Մելիք-Օհանջանյանը, իսկ գրախոսել էր կինոգետ Կարեն Քալանթարը: Հայ կինոյի 100-ամյակի առթիվ վերջապես հնարավորություն ստեղծվեց լույս ընծայել այս ժողովածուն, որը հովանավորել է բժշկական գիտությունների դոկտոր, պրոֆեսոր Նանա Պողոսովան:
Վիլենա Մելիք-Օհանջանյանը տարիներ շարունակ տարբեր աղբյուրներից հավաքել է հուշեր Բեկնազարյանի մասին, ինչպես նաեւ կապվել նրան ճանաչած անձանց հետ՝ խնդրելով գրի առնել եւ ուղարկել իրենց հիշողությունները: Արդյունքում 28 անձանց հուշերն են (մի մասը՝ ռուսերենից թարգմանված), որոնց թվում են այնպիսի նշանավոր անուններ, ինչպիսիք են Եֆիմ Ձիգանը, Վերիկո Անջափարիձեն, Դանիել Դզնունին, Լեւոն Իսահակյանը, Հենրիկ Մալյանը, Ստեփան Կեւորկովը, Գրիգոր Մելիք-Ադամյանը, Գուրգեն Թոնունցը եւ այլք: Հատորը բացվում է կինոգետ Սիրանույշ Գալստյանի «Մեր մեծ Համոն» եւ Վիլենա Մելիք-Օհանջանյանի «Հայ կինոյի մեծ հպարտությունը» հոդվածներով, իսկ եզրափակվում է Բեկնազարյանի կյանքի եւ գործունեության հիշարժան տարեթվերի ցանկով, հեղինակների անվանացանկով եւ Վիլենա Մելիք-Օհանջանյանի վերաբերյալ հոդվածով:
Նշենք, որ հայ կինոյի հիմնադրի վերաբերյալ վերջերս լույս է տեսել նաեւ «Համո Բեկնազարյան» եռալեզու (հայերեն, ռուսերեն, անգլերեն) պատկերագիրքը, որ կազմել են կինոգետ, թարգմանիչ Զավեն Բոյաջյանը եւ Հայաստանի Ազգային կինոկենտրոնի աշխատակից Ռուզան Բագրատունյանը:
Ա. Բ.
