Կորունյայի (Իսպանիա) «Սալվադոր դե Մադարիագա» եվրոպական ուսումնասիրություների համալսարանական ինստիտուտը լույս է ընծայել «Եվրոպան եւ նրա արեւելյան երկրները, մասնավորապես Հայաստանը» երկլեզու (անգլերեն-իսպաներեն) հատորը (համադրողներ եւ առաջաբանի հեղինակներ՝ Արտակ Մկրտչյան Մինասյան, Սամվել Պողոսյան): Հատորը կազմող 16 գլուխներից յոթը վերաբերում են հայոց պատմությանը, որոնց հեղինակները Հայաստանի Գիտությունների Ակադեմիայի եւ բուհերի գիտաշխատողներ են, իսկ երկուսն օտարազգի հետազոտողների հոդվածներ են: Հայությանը վերաբերող նյութերն են Լիլիթ Հովհաննիսյանի «Մեծ Բրիտանիայի եւ Միացյալ Նահանգների քաղաքականությունը հայկական հարցում 1919-1920 թթ.», Արմինե Եփրիկյանի «Եվրոպական երկրների դիրքորոշումը Նախիջեւանում 1919-1920 թթ.», Վանիկ Վիրաբյանի «Եվրոպական եւ ռուսական հատուկ ծառայությունների հակամարտությունն Անդրկովկասում 1918-1920 թթ.», Նելլի Բաղդասարյանի «ԵԱՀԿ Մինսկի խմբի համանախագահությունը վերսկսելու անհրաժեշտությունը ադրբեջանա-ղարաբաղյան հակամարտության լուծման գործընթացում», Էլինա Մխիթարյանի «Փախստականների իրավական կարգավիճակը չճանաչված երկրներում Լեռնային Ղարաբաղի (Արցախի Հանրապետության) օրինակով», Արտակ Մկրտչյան Մինասյանի «Եվրոպական Խորհրդարանի դիրքորոշումը Լեռնային Ղարաբաղի հակամարտության վերաբերյալ», Ալեքսեյ Անտոշինի «Հին ռուսական դեմոկրատները եւ հայ քաղաքական տարագրությունը Եվրոպայում Սառը պատերազմի առաջին փուլում», Բալինթ Կովաչի «Հայերի ընկալումները Եվրոպայի արեւելյան շրջաններում» աշխատությունները: Բոլոր նշված հոդվածներն անգլերեն են, միայն վերջինը՝ իսպաներեն:
Նկատենք, որ վերջերս Իսպանիայի մի քանի համալսարաններում որոշակի հետաքրքրություն է նկատվում հայագիտության տարբեր ճյուղերի վերաբերյալ: Այս տարվա ապրիլին Մադրիդի Կոմպլուտենս համալսարանում բացվել է հայագիտության հատուկ ամբիոն, Մադրիդի Սան Դամասոյի հոգեւոր համալսարանում դասավանդում է գրաբար, իսկ Գրանադայի համալսարանը պատրաստվում է հրատարակել հայ-իսպանական պատմական կապերին նվիրված ժողովածու:
Ա. Բ.
