Հայաստանի փոխվարչապետ Մհեր Գրիգորյանի գրասենյակը երեկ՝ հունիսի 2-ին, հաղորդագրություն էր տարածել, որ Գրիգորյանը մասնակցել է Մեծ Բրիտանիայի թագուհի Եղիսաբեթ 2-րդի գահակալության 69-ամյակին նվիրված տոնական միջոցառմանը: «Ազգ»ի տեղեկություններով՝ Հայաստանում Մեծ Բրիտանիայի դեսպանատան կազմակերպած ընդունելությանը, բացի փոխվարչապետ Գրիգորյանից, հրավիրված են եղել նաեւ Հայաստանում հավատարմագրված բոլոր դեսպանները, Էկոնոմիկայի նախարար Վահան Քերոբյանը, ԱԺ «Քաղաքացիական պայմանագիր» խմբակցության պատգամավորներ Բաբկեն Թունյանը, Մարիա Կարապետյանը, ընդդիմադիր թեւի՝ «Պատիվ ունեմ» խմբակցության պատգամավոր Թագուհի Թովմասյանը, ՀԱԿ փոխնախագահ Լեւոն Զուրաբյանը, քաղաքացիական հասարակության ներկայացուցիչներից՝ Ավետիք Իշխանյանը, լրատվադաշտի ներկայացուցիչներից՝ Aravot.am-ի խմբագիր Աննա Իսրայելյանը։
Մեր տեղեկություններով՝ ընդունելության ամբողջ ծախսերը հայկական տարբեր ընկերություններ են կատարել, մասնավորապես՝ «Կարաս» ու «Դարգետ» ընկերությունները, HSBC բանկը, Wigmore կլինիկան եւ այլն: Տեղեկացանք, որ ՀՀ-ում Մեծ Բրիտանիայի արտակարգ եւ լիազոր դեսպանը Ջոն Գալագերը ողջույնի խոսքում, որի նախաբանն, ի դեպ, հայերեն է եղել, մեկ առ մեկ շնորհակալություն է հայտնել միջոցառմանն աջակցած հայաստանյան ընկերություններին:
Բավական տարօրինակ ու զարմանալի է, որ աշխարհով մեկ ծրագրեր ու միջոցառումներ իրականացնող Բրիտանիան այդքան ջերմորեն է ընդունում փոքր Հայաստանի կազմակերպած միջոցառումը: Սա, իհարկե, շնորհակալության ժեստ կարող է լինել Բրիտանիայի դեսպանատանը կամ հենց Եղիսաբեթ թագուհուն: Բայց նաեւ հենց Մեծ Բրիտանիայի՝ Ադրբեջանում դեսպան Ջեյմս Շարպն ամիսներ առաջ Ջրական (Ջաբրայիլ) կատարած այցից հետո թվիթերյան իր էջում գրել էր, թե բրիտանական ընկերությունները պատրաստ են մասնակցել Ղարաբաղի վերականգնմանը։
ՍԵՎԱԿ ՎԱՐԴՈՒՄՅԱՆ
