Ներկայում մեծ ծավալի գիտական աշխատանքներ են կատարում ՀՀ ԳԱԱ ֆիզիկայի կիրառական պրոբլեմների ինստիտուտի աշխատակիցները: Նրանց կողմից մշակվել եւ ստեղծվել է թոքերի օդափոխման պարզագույն շնչառական սարքի լաբորատոր փորձանմուշ: Այն հնարավորություն է տալիս գրգռել ներշնչվող (արտաշնչվող) օդում տարբեր հաճախությամբ հարմոնիկ եւ ոչ հարմոնիկ տատանումները: Ցույց է տրվել, որ այդ տատանումները կարող են նպաստել թոքերից խորխի եւ օտարածին այլ մարմնիկների հեռացմանը (ղեկ.՝ ֆ.-մ.գ.թ. Հ.Խաչատրյան):
Մշակվել ու ստեղծվել է վիրուսային վարակների կանխարգելման սարք, որոշվել են նրա աշխատանքային բնութագրերը (ղեկ.՝ ֆ.-մ.գ.թ. Ռ.Չիլինգարյան): Մշակվել ու ստեղծվել է տարածքների ախտահանման համակարգ (ղեկ.՝ ֆ.-մ.գ.թ. Մ.Սարգսյան): ՀՀ տարածքում առկա հանքանյութերի օգտագործմամբ մանր դիսպերսիոն բենտոնիտի հիման վրա սինթեզվել է նոր նյութ, որը կարող է կիրառվել գյուղատնտեսությունում որպես ցածր ինքնարժեքով ու բարձր արդյունավետությամբ պարարտանյութ (ղեկ.՝ Գ.Ասատրյան):
2021թ. ԳԱԱ ինստիտուտները կազմակերպել եւ անցկացրել են 37 միջազգային եւ 42 հանրապետական գիտաժողովներ: ԳԱԱ համակարգի գիտահետազոտական կազմակերպություններն իրականացրել են գիտական եւ գիտահետազոտական աշխատանքներ 5 նպատակային, 44 բազային, 186 տնտեսական պայմանագրային ծրագրերով, ԿԳՄՍՆ գիտության կոմիտեի ֆինանսավորմամբ՝ 313 աշխատանք: Ստացված արդյունքներով հրապարակվել են 160 մենագրություն եւ ժողովածու (20-ն արտասահմանում), 21 ուսումնական ձեռնարկ եւ դասագիրք, 1550 հոդված գրախոսվող ամսագրերում (615-ն արտասահմանում), 481 հոդված գիտաժողովների նյութերի ժողովածուներում (210-ն արտասահմանում), 349 թեզիս (187-ն արտասահմանում):
Ստեփան ՊԱՊԻԿՅԱՆ
