Նոր հրատարակության առիթով գրական երեկոների կազմակերպման մշակույթն իրանահայ համայնքում վաղուց ձեւավորված գեղեցիկ ավանդույթներից է, իսկ այդպիսի առիթների ստեղծումը՝ իրանահայ եւ իրանցի մտավորականների մեկտեղման լավ հնարավորություն: Օրերս համայնքում Հայ մշակութային «Արարատ» կազմակերպության 80-ամյակի ծրագրերի շրջանակներում տեղի է ունեցել Պարույր Սեւակի ծննդյան 100-ամյակին նվիրված երեկո, որի ընթացքում կայացել է «Անլռելի զանգակատուն» պոեմի պարսկերեն գրքի շնորհանդեսը:
Հայ եւ ոչ հայ լսարանի համար երեկոն նախաձեռնել են «Արարատ» կազմակերպության 80-ամյակը նշող հանձնախումբը, «Բոխարա» գրական հանդեսը եւ «Նարիման» հրատարակչությունը Հումանիտար մտավորականների տան «Ֆիրդոսի» դահլիճում:
Գրական երեկոների կազմակերպման նպատակներին ու պոեմի պարսկերեն թարգմանության հրատարակմանն են անդրադարձել «Բոխարա» հանդեսի տնօրեն Ալի Դեհբաշին եւ «Նարիման» հրատարակչության տնօրեն Մոջթաբա Նարիմանը:
Միջոցառմանը Պարույր Սեւակի գրական-հասարակական գործունեության մասին բանախոսություններով հանդես են եկել Սերգեյ Բարսեղյանը եւ դոկտոր Կարեն Խանլարյանը: Սեւակագետ Սեւակ Ղազարյանն իր գնահատանքն է հայտնել կազմակերպված միջոցառման համար:
Հարկ է նշել, որ պոեմը պարսկերեն է թարգմանել Գեւորգ Նուբարյանը: Միջոցառմանը ներկա են գտնվել Իրանի Իսլամական խորհրդարանում Թեհրանի եւ հյուսիսային, Սպահանի եւ հարավային իրանահայության պատգամավորներ Արա Շահվերդյանն ու Գեղարդ Մանսուրյանը, համայնքային գործիչներ, մտավորականներ եւ գրասերներ:
Ի դեպ, հետաքրքրական է, որ Իրանի Բաղերալ Ուլումի անվան իսլամական հետազոտությունների եւ հրատարակչության կենտրոնի միջոցով լույս է տեսել նաեւ Մոհամմադ Սադեղ Ահմադիի հեղինակած «Քրիստոնյա գործիչներ» գիրքը: Գրքում ներկայացված է տեղակատվություն պատմական տարբեր ժամանակաշրջաններում եկեղեցու պատմության, աստվածաբանության, աստվածաշնչյան լեզուների, քրիստոնեական դավանանքի, եկեղեցական ծեսերի, դասընթացների եւ այլ հարցերի վերաբերյալ:
582 էջից բաղկացած ժողովածուում ընդգրկված է ավելի քան 120 հոդված քրիստոնեական կրոնի պատմության մեջ մեծ դեր խաղացած նշանավոր անձանց գործունեության վերաբերյալ:
ԿԱՐԵՆ ՄԿՐՏՉՅԱՆ
Իրանագետ
