Իտալիայի Տրենտո մարզի Ռովերետո քաղաքում սեպտեմբերին կայացավ «Արեւելք-Արեւմուտք» պարի փառատոնի 42-րդ թողարկումը: Փառատոնն օգտագործում է պարի համընդհանուր լեզուն մշակույթներ եւ վայրեր կամրջելու համար: Այս տարի փառատոնում համերգով ելույթ է ունեցել նշանավոր հայ դուդուկահար Գեւորգ Դաբաղյանը: 2008 թվականին ՅՈՒՆԵՍԿՕ-ի համաշխարհային ժառանգության մաս դարձած երաժշտական գործիքի՝ դուդուկի վարպետի համերգը կոչված էր նշելու Հայաստանի Հանրապետության դրոշի մուտքը 102 ազգերի եւ կազմակերպությունների շարքը, որոնք պաշտոնապես միացել են Ռովերետոյի «Խաղաղության զանգ» հիմնադրամի խաղաղության հուշագրին: Այդ առիթով իտալացի նշանավոր լրագրող, atlanteguerre.it կայքէջի խմբագիր Էմանուել Ջորդանան նախագահել է Լեռնային Ղարաբաղի վերաբերյալ խորհրդակցություն Հիմնադրամի սրահներում, որտեղ մինչեւ հոկտեմբերի 4-ը բաց է իտալացի լրագրող եւ լուսանկարիչ Ռոբերտո Տրավանի «Այլոց պատերազմը» ցուցահանդեսը՝ նվիրված Արցախին: Վերջինս Արցախում լուսանկարներ է կատարել 2016-ի քառօրյա պատերազմի եւ 2020-ի 44-օրյա պատերազմի ժամանակ:
Ա. Բ.
