«Զվարթնոց»-ը հայ սահմանապահները կհսկեն

Իշխող կուսակության խորհրդարանական խմբակցության հետ մեկ օր առաջ տեղի ունեցած փակ հանդիպումից հետո Անվտանգության խորհրդի քարտուղար Արմեն Գրիգորյանն էլի աչքի ընկավ ռուսական ուղղությամբ կոշտ բարձրաձայնումներով: Ի պատասխան ՌԴ նախագահի խոսնակ Դ. Պեսկովի այն հայտարարությանը, թե «Զվարթնոց» օդանավակայանից ՌԴ սահմանապահներին հանելու հայտ Հայաստանից ՌԴ-ն չի ստացել, Գրիգորյանն, ընդհակառակը, նշեց, որ ՌԴ-ին տեղյակ պահվել է, որ «Զվարթնոց»-ում ծառայություն են իրականացնելու ՀՀ սահմանապահները, եւ վերահսկողության համար բոլոր կարողություններն առկա են: Իսկ ՀԱՊԿ-ին Հայաստանի անդամության սառեցման վերաբերյալ ՌԴ արտգործնախարար Սերգեյ Լավրովի այն ասածին, թե Հայաստանը պետք է կողմնորոշվի՝ ո՞ր ուղղությամբ է գնում, Գրիգորյանը հակադարձեց, որ ՀԱՊԿ-ը չի դատապարտել Հայաստանի տարածքի օկուպացիան, չի ճանաչել Հայաստանի սահմանը, եւ հենց Ռուսաստանը, որպես ՀԱՊԿ անդամ, պետք է հստակեցնի իր դիրքորոշումները Հայաստանի հանդեպ: