Ավագ շաբաթ երեկոյան կատարվեցին Ս. Զատկի ճրագալույցի արարողությունը եւ պատարագըՙ ազդարարելով Փրկչի հրաշափառ հարության ավետիսը: «Քրիստոս յարեաւ ի մեռելոց, օրհնեալ է յարութիւնն Քրիստոսի»: Այս ավետիսով ավարտվում է Մեծ Պահքըՙ եզրափակելով Տիրոջ չարչարանքների շաբաթը եւ ավետելով նրա հարությունը մեռելներից: Ավագ շաբաթՙ Ճրագալույց Զատկի, որին հաջորդում է Զատիկը, երբ Աստված հանգստացավ իր բոլոր գործերից: Հիսուս Քրիստոսի հրաշափառ հարության տոնը կոչվում է նաեւ Զատիկ, որ նշանակում է զատում, հեռացում մեղքերից եւ վերադարձ առ Աստված:
Զատիկը Հայ Առաքելական եկեղեցու հինգ տաղավար եւ մեր ժողովրդի ամենասիրելի տոներից է, որի արարողություններն այս տարի, ցավոք, առաջին անգամ կատարվում են փակ դռների հետեւում, առցանց հեռարձակմամբ միայն հնարավոր դարձնելով մեր ժողովրդին հաղորդակից լինել տոնի ուրախությանը: Կիրակի կտոնենք հրաշափառ հարությունըՙ ականջ ի լուր «Ինչո՞ւ եք ողջին մեռելների մեջ փնտրում»-ը եւ հարության հրաշքըՙորպես հավատի առհավատչյա: Սա տոն է հոգու եւ հավատի նորոգման, մեղքից մաքրագործման եւ, ինչու չէՙ բնության զարթոնքի: Հիվանդ, թե առողջՙ կիրակի կողողվեն Սուրբ Զատիկի հրաշքով, իրար կասեն «Քրիստոս Յարեաւ ի մեռելոց» ավետիսը եւ կստանան պատասխանՙ «Օրհնեալ է Յարութիւնն Քրիստոսի» :
