ՌՈՒՍ-ԹՈՒՐՔԱԿԱՆ ԼԱՐՎԱԾՈՒԹՅԱՆ ՆՈՐ ՓՈՒԼ Փետրվարի 12-ին Թուրքիայի նախագահ Էրդողանը, խոսելով Իդլիբում զոհված թուրք զինվորների մասին, մեղադրական խոսքեր է հնչեցրել ՌԴ-ի հասցեին. «Ռեժիմի ուժերը, նրանց հետ համագործակցող ռուսներն ու Իրանի կողմից աջակցություն ստացող զինյալները պարբերաբար հարձակվում են խաղաղ բնակչության վրա: Իդլիբում քաղաքացիական բնակավայրերին օդային հարված հասցնողներներն արդեն նախկինի պես ազատ գործել չեն կարող: Մեզ տրված խոստումները չեն կատարվել, պայմանավորվածություններն էլ ոչ ոք հաշվի չի առնում»-ասել է Էրդողանըՙ միաժամանակ նշելով, որ իրենք ամեն բան անելու են, որպեսզի բոլոր ոչ թուրքական ուժերը մինչեւ այս ամսվա վերջ դուրս գան տարածքից: Մինչդեռ, հիշեցնենք մեր կողմից, ոչ ոք թուրքերին չի հրավիրել Սիրիա: Նույն օրը Թուրքիայի արտգործնախարար Մեւլութ Չավուշօղլուն Ալբանիայի փոխարտգործնախարարի հետ մամուլի ասուլիսին անդրադառնալով Իդլիբին, հայտարարել է, որ իրավիճակը պետք է շտկվի, որի նպատակովՙ Թուրքիայից պատվիրակություն կմեկնի Մոսկվաՙ բանակցելու: Նա նույնպես ռուսական կողմին մեղադրել էՙ պայմանավորվածությունները խախտելու մեջ եւ, հղում անելով երկրի նախագահին, հայտարարել, որ Թուրքիան Սիրիայում ռազմագործողություններ կիրականացնի թե՛ ցամաքում, թե՛ օդում: Ավելի ուշՙ փետրվարի 13-ին հայտնի դարձավ, որ ռուսական 112մ երկարություն ունեցող «Ցեզար Կունիկով» դեսանտային ռազմանավը Թուրքիայի ժամանակով ժամը 09:00-ին Մարմարա ծովից անցնելով Դարդանելի նեղուցը, մուտք է գործել Միջերկրական ծով: |
