«Բարգավաճ Հայաստան» կուսակցության վերաբերյալ վերջին շրջանում շատ խոսվեց թվում է, բայց, միեւնույն է, հասարակությունը շատ հարցերի պատասխան այդպես էլ չստացավ: «Ազգը» այդ հարցերի պատասխանը փորձեց ստանալ ԲՀԿ նախագահ, ԲՀԿ խորհրդարանական խմբակցության ղեկավար Նաիրա Զոհրաբյանից:
– Խորհրդարանում այս շաբաթ հայտարարեցիք, որ ձեր խմբակցությունն ընդդիմադիր է: Այդ «ընդդիմադիրը» շատ տարողունակ հասկացություն է` արմատակա՞ն եք, կառուցողակա՞ն եք, լիբերալ գաղափարախոսության կրո՞ղ եք` մանավանդ նախորդ ԲՀԿ-ն իրեն այլընտրանք էր անվանում…
– Ես ձեռնպահ կմնամ «ընդդիմադիր» ձեւակերպման երանգավորումները մեկնաբանելուց` արմատական, կառուցողական… Հիմա նոր տերմին է շրջանառության մեջ դրվումՙ «ինստիտուցիոնալ ընդդիմություն»: «Բարգավաճ Հայաստանը» գործելու է ընդդիմադիր դաշտում
– Բովանդակային առումով դա ի՞նչ է դա նշանակում:
– Թե ինչո՞վ ենք տարբերվելու մյուս ընդդիմադիր միավորներից` օրինակով ասեմ: Օրինակ, երբ երկրի նախագահը մտահոգություն է արտահայտում, որ երկրի ռազմավարական դաշնակից Ռուսաստանը ծանր սպառազինություն է վաճառում Ադրբեջանին, էդ մտահոգությունը մենք կիսում ենք ու ասում ենք էդ մասին: Մենք չենք կարող այդ մտահոգության հետ չհամաձայնել միայն այն պատճառով, որ դա ասում է հանրապետության նախագահը: Ի տարբերություն քաղաքական ուժերի, որոնց մարտավարությունն այն է, որ իշխանության ներկայացուցչի ասած նույնիսկ պոզիտիվը, դրականը կամ ճշմարիտը պետք չի հաստատել կամ բարձրաձայնել, քանի որ դա ասում է իշխանության ներկայացուցիչը: Կամ, օրինակ, երբ մեզ հրավիրում են սահմանադրական փոփոխությունների հայեցակարգի վերաբերյալ քննարկումների, մենք ասենք, որ չենք գնալու, քանի որ հրավերը Սերժ Սարգսյանի կողմից է (ժամանակին պարոն Ծառուկյանը, պարոն Օսկանյանը, Ստեփան Մարգարյանը եւս մասնակցել են նմանօրինակ քննարկումների): Ասում ենք` գնացել ենք, եւ գնալու ենք, եւ ներկայացնելու ենք, հիմնավորելու ենք մեր տեսակետը, այն է` որ այսօր կան ներքին եւ արտաքին կայունության, տնտեսությունը կարգի բերելու խնդիրներ, կա չկայացած կուսակցությունների լրջագույն պրոբլեմ, այդ պատճառով վտանգավոր ենք համարում այս պահին խորհրդարանական կառավարման անցնելը:
– Այսինքն` դուք ի՞նչ եք առաջարկում:
– Քանի դեռ չկա քննարկման դրված որեւէ մոդել, այլ ընդամենը խորհրդարանական համակարգին անցնելու թեզ կա, այս փուլում շարունակում ենք դեմ մնալ` ունենալով մեր ծրագրային հիմնադրույթներում խորհրդարանական համակարգին անցնելու դրույթը: Վերը նշված պրոբլեմների այս փնջով խորհրդարանական կառավարման մոդելին անցնելն այս փուլում աննպատակահարմար ենք համարում:
Սահմանադրական փոփոխությունների հանձնաժողովի անդամ Գեւորգ Դանիելյանն ինքը փաստեց, որ մի նոր առաջարկ եւս ներկայացվել է հանձնաժողովին, ըստ որի պետք է աշխատել գործող մոդելի վրա` պահպանելով կիսանախագահական մոդելը, հանձնաժողովի անդամներն այս առաջարկի վրա հիմա փորձում են լուծումներ գտնել: Այնպես որ` այդ հանձնաժողովի անդամ չլինելով եւ տեղյակ չլինելով, թե առհասարակ ինչ մոդելներ են գալու խորհրդարան (մանավանդ ՀՀԿ ԳՄ նիստից հետո Հերմինե Նաղդալյանը հայտարարեց, որ չի բացառվում երկու տարբերակ գա խորհրդարան), խոսել, թե ինչ դիրքորոշում կորդեգրի «Բարգավաճ Հայաստանը», առնվազն անլուրջ է: Իսկ առհասարակ` խորհրդարանական համակարգն այս փուլում մեզ համար մերժելի է: Երբ կլինեն այդ տարբերակները, էդ ժամանակ մենք մեր դիրքորոշումը կասենք:
– Վերադառնանք ԲՀԿ-ին: Խմբակցության շարքերը նոսրացել են (11 պատգամավոր ԲՀԿ-ից հեռացել են), ու չնայած ԲՀԿ-ից հեռացած պատգամավորները մնացել են խմբակցությունում, նրանք ձեզ համար ձայն ապահովող չեն, նվազ ձայներով ինչպե՞ս եք կառուցելու ձեր աշխատանքը:
– Այդ հարցին ես շատ հանգիստ եմ մոտենում, ես հարգում եմ իմ բոլոր գործընկերների դիրքորոշումը, ովքեր այս կամ այն հիմնավորմամբ դուրս են եկել ԲՀԿ-ից, մեր միջեւ մարդկային հարաբերությունները շարունակվում են, շատերը շարունակում են մասնակցել խմբակցության նիստերին: Մեր օրենսդրությունն այնպիսին է, որ ԲՀԿ-ից դուրս եկողները չեն կարող խմբակցությունից դուրս գալ, հակառակ դեպքում պիտի վայր դնեն պատգամավորական մանդատը:
– Բայց եթե նրանք ԲՀԿ-ում չեն` ի վերջո կարող են իրենց մանդատը վայր դնել, ու խորհրդարան կգան ձեր մյուս կուսակիցներից, սա արդարացի կլիներ:
– Կարծում եմ` այդ հարցը պետք է ուղղեք իրենց: Իսկ ես շարունակելու եմ հարգել Ազգային ժողովի կանոնակարգ-օրենքը եւ խմբակցության բոլոր նիստերին նաեւ հրավիրել նրանց, քանի որ դե յուրե նրանք խմբակցության անդամ են, իրենք պետք է որոշեն:
– Այսինքն` հարցը բարոյական դաշտո՞ւմ է:
– Միգուցե, բոլոր դեպքերում իրենք պետք է որոշեն` ինչու են մնում «Բարգավաճ Հայաստան» խմբակցությունում:
– Ունե՞ք ձեր դիրքորոշումները գոնե ընթացիկ քայլերի իմաստով:
– Հիմնական խնդիրները, որ տարիներով բարձրացրել է «Բարգավաճ Հայաստանը», չեն փոխվել մեզ համար, փետրվարի 12-ից հետո երկրի առջեւ ծառացած լրջագույն մարտահրավերները հո չլուծվեցին: Եւ ԲՀԿ-ն հետամուտ է լինելու բոլոր այդ խնդիրների լուծմանը` ինչպես առաջ, այնպես էլ այսօր: Թե ինչ ճանապարհ կընտրենք, ինչ մարտավարություն կորդեգրենք` մենք հիմա աշխատում ենք մեր նոր մարտավարության վրա, կգա ժամանակը, եւ կներկայացնենք մեր նոր քաղաքական օրակարգը, որն ըստ էության չի փոխվել, ուղղակի պիտի գտնենք ուղիները, թե ինչպես հասնել այդ խնդիրների լուծմանը: Իսկ ուղղակի ասել, որ փետրվարի 12-ից հետո ոչինչ տեղի չի ունեցել, կարծում եմ` ազնիվ չի լինի: «Բարգավաճ Հայաստանն» անցավ լրջագույն տրանսֆորմացիայի փուլ, եւ, փառք Աստծո, հիմա գնում է կայունացման վիճակի, մենք որոշակի հարցեր բնականաբար եւ օբյեկտիվորեն հիմա վերանայելու խնդիր ունենք` հաշվի առնելով առկա ռեսուրսները եւ հնարավորությունները: Կարելի է շատ բան հայտարարել, որոնք ականջահաճո լինեն հանրությանը, բայց պետք է հաշվարկես քո ռեսուրսները` ունե՞ս այդ պահին այդ խնդիրներն իրագործելու ռեսուրսներ:
– Ունե՞ք ռեսուրսներ, չեմ կարող նաեւ չանդրադառնալ այն խոսակցություններին, որ Հայասստանի վարչապետն է ԲՀԿ-ին ֆինանսապես հովանավորելու:
– Նախ ես ռեսուրս ասելով նկատի չունեի ֆինասական ռեսուրսները, բայց դա եւս կարեւոր է: Ինչ վերաբերում է վարչապետի հետ կապված խոսակցությանը` դա բացարձակ ապատեղեկատվություն է: Գիտեք` մեր քաղաքական դաշտի, կասեի` երկրի ամենամեծ պրոբլեմներից մեկն այն է, որ առաջնահերթությունը տրվում է հերյուրանքին, ասեկոսեներին, բամբասանքներին, ոչ թե ռեալ, իրական գործընթացներին: Երբ ես նայում եմ մեր առաջատար կայքերի ամենաընթերցված նյութերի բաժինները եւ տեսնում եմ , որ ամենաընթերցված լուրն այն է, թե «Բարգավաճ Հայաստան» խմբակցության պատին ում տաբլոն որտե՞ղ է փակցված, ու դա ավելի ընթերցված է, քան այն, ինչ կատարվում է այսօր երկրի տնտեսության հետ, կամ որ` սահմանին ամեն օր զոհ ունենք, որպես նախկին լրագրող համարում եմ, որ սա ողբերգություն է: Ցավոք` մենք չկարողացանք նպաստել ճիշտ եւ գրագետ լրատվություն սպառող հասարկության ձեւավորմանը, որի համար կարեւորն այն է, թե ում անունը խմբակցության պատին ավելի վերեւ կամ ներքեւ է, ոչ թե այն լրջագույն համակարգային խնդիրները, որ այսօր կանգնած են երկրի առջեւ: Դա մեր ողբերգությունն է: Ահա այս տեսակ ապատեղեկատվությամբ են փորձում հանրությանը կերակրել:
– Գագիկ Ծառուկյանի հետ կատարվածից հետո նաեւ տեսակետ հնչեց առ այն, որ ճիշտ կլիներ, որ Ծառուկյանի հեռանալուց հետո ԲՀԿ-ն լուծարվեր, քանի որ ԲՀԿ-ն նրա շուրջ ստեղծված կուսակցություն էր…
– Նախ` Գ. Ծառուկյանի եւ մեր կուսակցության ու խմբակցության հարաբերությունները խիստ մարդկային ու ջերմ են: Ուզում եմ հիասթափեցնել բոլոր նրանց, ում մտքով կանցնի, որ մեզանից որեւէ մեկը կարող է երբեւէ ոչ պատշաճ կամ ոչ հարգալից քայլ անել Գ. Ծառուկյանի հանդեպ: Նա կուսակցության հիմնադիրն է, նա լուրջ ավանդ եւ ներդրում ունի «Բարգավաճ Հայաստանի» կայացման գործում, ԲՀԿ-ն էլ այսօր հանրային մեծ վստահություն վայելող ուժերից մեկն է: Իսկ ինչ վերաբերում է լուծարվելու տեսակետին` ԲՀԿ-ն մի հոգանոց կուսակցություն չէ, բազմահազարանոց կուսակցություն է, ստացել է 500 հազար քաղաքացու քվե, կուսակցությունն էլ խանութ կամ օֆիս չէ, բանալին էլ մեզանից որեւէ մեկի գրպանում չէ, որ մեջքով շրջվենք մեր այն քաղաքացիներին, որոնք այսօր էլ մեր կողքին կանգնած են եւ հույսեր են կապում ԲՀԿ-ի հետ. նրանց ասե՞նք` «ցտեսություն, մենք գնացի՞նք»: Մենք պատասխանատվություն ունենք հարյուրհազարավոր քաղաքացիների առջեւ: Այսօր ես որպես ԲՀԿ նախագահ ստորագրել եմ ԲՀԿ-ին անդամակցելու 107 նոր դիմում, նրանց գերակշիռ մասը մտավորականներ են:
– Կարո՞ղ եք ասել կուսակցականների թիվը:
– Գիտեք` այդ հարցով զբաղվում են Վարդան Վարդանյանը, Վահան Բաբայանը, ես կդժվարանամ այս պահին թիվ ասել: Վերջնական ճշգրտումներից հետո կկարողանանք պատասխանել բոլոր հարցերին: Բազմաթիվ տարածքային կառույցների ներկայացուցիչներ այսպես ասած` տեմպի տակ կամ պահի տակ դիմում գրեցին կուսակցությունից դուրս գալու վերաբերյալ, հիմա գերակշիռ մեծամասնությունը նորից դիմում է գրել վերադառնալու, եւ մենք այդ դիմումները քննարկելու ենք առանձին-առանձին ու որոշելու ենք` նրանցից ում դիմումը հարգել, ումը` ոչ:
– Հեռացածներից շատերը Ծառուկյանի շուրջ էին համախմբվել, եւ կարեւորը` եկել էին ոչ ընդդիմադիր կուսակցություն, իսկ հիմա ԲՀԿ-ն ընդդիմադիր է…
– Երբ ԲՀԿ-ն համագումարում ընդդիմություն հռչակեցինք` տարածքային կառույցների եւ խմբակցության պատգամավորների հետ այդ հարցը քննարկել էինք, անհամաձայնները կուսակցությունից հեռանալու դիմում էին գրել:
– Տիգրան Ուրիխանյանը նոր է հեռանալու դիմում գրել:
– Տ. Ուրիխանյանը մեր գործընկերն է, ներդրում է ունեցել կուսակցության այս տարիների գործունեության մեջ, եւ հիմա նոր քաղաքացիական շարժում է ձեռնարկել: Տիգրանի հետ քննարկելով` եկել ենք այն եզրակացության, որ ինքը որպես անկուսակցական իր գործունեությունը շարունակի, այնպես որ` նա շարունակում է մնալ մեր գործընկերը, մեր խմբակցության անդամ, եւ մենք պայմանավորվածություն ունենք միմյանց սատարել այն հարցերում, որոնց վերաբերյալ միատեսակ տեսակետներ ունենք:
– Ձեզ համար դժվա՞ր է ԲՀԿ նախագահ լինելը, հատկապես` Ծառուկյանից հետո, Ձեզ խանգարողները շատ ե՞ն:
– Այո, դժվար է: Անկեղծ չեմ լինի, եթե ասեմ, որ հեշտ է: Շատ բարդ է Գագիկ Ծառուկյանից հետո ստանձնել նման պատասխանատվություն: Բայց նաեւ կասեմ, որ ես ռեալ գնահատել եմ քաղաքական գործչի իմ հնարավորությունները ու համաձայնել եմ մտնել նման պատասխանատվության տակ: Նման վստահություն տվել են իմ գործընկերները, որոնք ինձ հետ միասին լինելու են որոշումների կայացման մասնակից եւ հավասարապես կիսելու են պատասխանատվությունը: Մեր աշխատանքը բացառապես լինելու է թիմային, որոշումները կայացվելու են մեծամասնության համաձայնությամբ:
– Քաղաքական ուժերից ո՞ւմ հետ եք համագործակցելու:
– Որեւէ քաղաքական ուժի հետ համագործակցելու բարդույթ մենք չունենք, որտեղ կտեսնենք ընդհանուր շահեր կամ համագործակցության ընդհանուր եզրեր` երկրի առջեւ ծառացած լրջագույն համակարգային խնդիրների առումով, մենք պատրաստ ենք համագործակցել:
