ՄԹԵՐԱՅԻՆ ՍԱՀՄԱՆԱՓԱԿՈՒՄՆԵՐ ԵՎ ԳՐԻՎՆԱՅԻ ԱՆԿՈՒՄ ՈՒԿՐԱԻՆԱՅՈՒՄ Պ. Ք. Վերջին շաբաթներին Ուկրաինայում այսպես կոչված սոցիալական խմբի մթերքների թանկացումների հետ մեկտեղ տեղի են ունենում դրանց վաճառքի սահմանափակումներ: Այդ մասին հաղորդում են հենց ուկրաինական լրատվամիջոցները: Այսպես, ՌՆՆ լրատվական գործակալության թղթակիցը Կիեւի մի քանի խոշոր ցանցային խանութներ այցելելով պարզել է, որ այժմ մեկ անձի հաշվով կարելի է ձեռք բերել միայն 2 շիշ արեւածաղկի ձեթ, 2 փաթեթ հնդկաձավար, 3-5 կգ ալյուր եւ 3-5 կգ շաքար: Նման սահմանափակուներ մտցնելու մասին շատ խանութներ տեղեկացնում են հայտարարությունների ձեւով: Լրագրողները նշում են, որ հացի, բրնձի, կարտոֆիլի, մսեղենի ու կաթնեղենի վրա առայժմ սահմանափակումներ չեն մտցվել, սակայն տեսականին վերջերս էականորեն կրճատվել է: Ապրանք իրացնողները խորամանկում ենՙ վաճառասեղանները լցնելով մեկ մակնիշի, հիմնականումՙ սեփական արտադրության ապրանքներով: Այդուհանդերձ խանութների մեծ մասում ի հայտ են եկել բազմաթիվ դատարկություններ, նշում է ուկրաինական գործակալությունը: Միեւնույն ժամանակ Լվովի լրատվական կայքէջը հաղորդում է, որ դոլարի փոխարժեքի աճը եւ երկրի տնտեսության տագնապալի վիճակը խուճապային տրամադրություններ են առաջացրել. շատերն աճապարում են ձեռք բերել հնարավորինս շատ մթերք կամ արտարժույթ: Վարչապետ Յացենյուկի հրապարակած տվյալների համաձայն, վերջին 9 ամսում Ուկրաինայի բնակչությանը վաճառվել է 51,5 մլրդ դոլար: Փետրվարի 25-ին Յացենյուկի պահանջով Ռադայի արտահերթ նիստ է հրավիրվել ազգային արժույթըՙ գրիվնան փրկելու նպատակով: Վարչապետը գրիվնայի թուլացումը մասամբ պատճառաբանել է «սպեկուլյատիվ գործարքներով»: Մոսկովյան «Վեդոմոստի» թերթը նշում է, որ տարեսկզբից գրիվնան արժեզրկվել է 1,8 անգամ: Օրինակ, փետրվարի 24-ին 1 դոլարը պաշտոնապես արժեր 28,2 գրիվնա: Փոխանակման կետերում 1 դոլարի դիմաց տալիս են 35 գրիվնա, իսկ «սեւ» շուկայումՙ 40 եւ ավելի: Արժե հիշեցնել, որ ուկրաինական «հեղափոխության» նախօրեինՙ 2014 թ. սկզբներին 1 դոլարը փոխանակվում էր ընդամենը 8 գրիվնայով: |
