«Մեր մոտեցումների, տրամադրվածության մեջ ոչինչ չի փոխվել։ Իհարկե, մեր պահանջը չի փոխվել»,- Armlur.am-ի հետ զրույցում ասել է «Վերածնվող Հայաստան» կուսակցության նախագահ, ԱԺ «Հայաստան» խմբակցության պատգամավոր Վահե Հակոբյանը։
Մեկ տարի առաջ երկիրը պատերազմի տարած և այդ պատերազմում պլանավորված պարտություն կրած իշխանությանը հեռացնելու պահանջով ընդդիմության պայքարը, ինչպես նշել է Վահե Հակոբյանը, շարունակվելու է նաև փողոցում։
«Մենք երբեք փողոցում պայքարից չենք էլ հրաժարվել»,- ասել է նա և ընդգծել, որ դա տարբերակներից մեկն է միայն։
«Միակ տարբերակը չէ, տարբերակներից մեկն է, որով, ի վերջո, պետք է հասնենք մեր նպատակին՝ այս իշխանություններին մեր կյանքից հեռացնելուն»,- նշել է Վահե Հակոբյանը։
Նա հայտնել է, որ պայքարի ու բողոքի գործողությունների օրակարգը, ծրագիրը կա, սակայն հավելյալ մանրամասներ չի ներկայացրել։
Հարցին՝ չե՞ք բացառում նստացույցերը, փողոցում գիշերելը, Վահե Հակոբյանը պատասխանել է․ «Ոչինչ չեմ բացառում»։
