Զինված ուժերի հայտարարությունն ու դրան հետևած քայլերը, իմ գնահատմամբ, լիարժեք տեղավորվում են սահմանադրական վերոհիշյալ պարտականության շրջանակներում. Արսեն Բաբայան
Հայաստանի Հանրապետության զինված ուժերն ապահովում են Հայաստանի Հանրապետության պաշտպանությունը, անվտանգությունը, տարածքային ամբողջականությունը և սահմանների անձեռնմխելիությունը: Այս մասին ֆեյսբուքում գրել է «Հայրենիք» կուսակցության անդամ Արսեն Բաբայանը.
«Սահմանադրության 14-րդ հոդվածի 1-ին մասի այս սահմանումից հետևում է, որ Զինված ուժերը պարտավոր են հակազդել ցանկացած այնպիսի միջամտության, որը սպառնում է կամ կարող է սպառնալ ՀՀ պաշտպանությանը, անվտանգությանը, տարածքային ամբողջականությանը և սահմանների անձեռնմխելիությանը:
Շուրջ երեք ամիս է, ինչ վարչապետի պաշտոնն ուզուրպացրածի և նրա նախարարների կողմից հատուկ ծրագրով իրականացվում է Հայաստանի պաշտպանության, անվտանգության համակարգերի քայքայում և սահմանների փոփոխություն: Այս հանգամանքներում Զինված ուժերի հայտարարությունն ու դրան հետևած քայլերը, իմ գնահատմամբ, լիարժեք տեղավորվում են սահմանադրական վերոհիշյալ պարտականության շրջանակներում: Ավելին՝ Զինված ուժերը պարտավոր էր անել այն, ինչ արել է:
Հանրապետության նախագահն էլ, իր հերթին, պարտավոր է հետևել Սահմանադրության պահպանմանը: Այսօր նախագահը, այս փուլում, լիարժեք կատարեց սահմանադրական իր պարտականությունը:
Փաստենք, որ մնացել է Սահմանադրական կարգի միայն մեկ թշնամի, որի հարցերը շատ շուտով ու վերջնականապես կլուծվի»:
Իրավապահ մարմիններին հորդորում եմ գործել սահմանադրությամբ և օրենքներով իրենց վրա դրված գործառույթների շրջանակներում և կատարել իրենց վրա դրված պարտականությունը:
