GPS-ով սահման գծելը պարզ հանրության («պողոսների») շրջանում ընկալվում է անգլերեն իմանալու պես մի բան. ով գիտի՝ զարգացած է, իսկ իր խոսքերը՝ գերագույն ճշմարտություն: Այսինքն՝ եթե այդ «խորհրդավոր» համակարգի հենքի վրա է գծում Նիկոլը, ուրեմն դա գերագույն ճշմարտությունն է, իսկ ովքեր պայքարում են դրա դեմ և պահանջում, որ գյուղերն ու շրջանները չհանձնվեն՝ հետամնացներ են կամ չուզվորներ:
Հատուկ բացատրենք քաղաքացիների համար։
GPS-ը ամերիկյան նավիգացիոն համակարգ է։
Բոլորը ունեն իրենց սմարթֆոններում նման ալեհավաք, որը տիեզերքում գտնվող արբանյակների օգնությամբ ցույց է տալիս քո գտնվելու կետը երկրագնդի վրա։ Դրա համար է կոչվում Global Positioning System։
Նման համակարգ ունի Ռուսաստանը։ Կոչվում է GLONASS։
Չինաստանը ստեղծել է սեփական համակարգը` BeiDou անունով։
Այսինքն, սա մի համակարգ է, որը տարբեր արբանյակների տվյալներով ֆիքսում է սարքի գտնվելու կետը։
GPS-ը և մյուս համակարգերը ՔԱՐՏԵԶ ՉԵՆ։ Այն սահմաններ հաստատող և, առավել ևս, որոշող ծրագիր չէ։ Ընդամենը նշում է այդ կետի ԿՈՈՐԴԻՆԱՏՆԵՐԸ։ Իսկ այդ կետի վարչական պատկանելության հարցը որոշվում է սահմանակից երկրների կողմից՝ միջպետական համաձայնագրերով։ Եթե առկա է տարաձայնություն, ապա կողմերը դիմում են երրորդ կողմին կամ միջազգային արբիտրաժ։
Հետևաբար, եկեք հստակ ամրագրենք. երբ ասում են GPS-ով սահման ենք որոշում, ապա պարզապես հիմարացնում են քաղաքացուն։ Իսկ ինչի՞ համար է դա արվում` արդեն ասել ենք։
Դավաճանությունը հո պոզով պոչով չի՞ լինում։
Yerkir.am
