ԵԱՏՄ-ն սպասում է, որ Հայաստանը մինչև դեկտեմբեր կհայտարարի հանրաքվեի մասին. Ռուսաստանի ԱԳՆ

Հայաստանը պետք է մինչև 2026 թվականի դեկտեմբեր որոշում կայացնի Եվրամիությանը միանալու կամ Եվրասիական տնտեսական միությունում (ԵԱՏՄ) անդամակցությունը պահպանելու վերաբերյալ համազգային հանրաքվե անցկացնելու մասին, երբ ԵԱՏՄ անդամ պետությունների ղեկավարների հանդիպմանը կքննարկվի Երևանի նկատմամբ հնարավոր հետագա քայլերի հարցը։ Այս մասին ՏԱՍՍ-ին տված հարցազրույցում հայտարարել է Ռուսաստանի արտաքին գործերի նախարարի տեղակալ Միխայիլ Գալուզինը։

«Ակնհայտ է, որ եթե մինչև այդ պահը հանրաքվեի կոչը չլսվի, առաջնորդները այդ փաստը հաշվի կառնեն հետագա համապատասխան համատեղ քայլերը որոշելիս», — նշել է նա։

ՌԴ ԱԳՆ փոխնախարարը հիշեցրել է, որ «մայիսի 29-ին ընդունված Ռուսաստանի, Բելառուսի, Ղազախստանի և Ղրղզստանի նախագահների համատեղ հայտարարության մեջ՝ Հայաստանի եվրոպական ձգտումների վերաբերյալ, խոսվում է այս երկրում հնարավորինս սեղմ ժամկետներում Եվրամիությանը միանալու կամ ԵԱՏՄ կազմում հետագա մնալու հարցով համազգային հանրաքվե անցկացնելու անհրաժեշտության մասին, սակայն առանց կոնկրետ ժամկետ նշելու»։

«Միևնույն ժամանակ արդեն նշվել է, որ այս հարցը կրկին կքննարկվի դեկտեմբերին կայանալիք Եվրասիական բարձրագույն տնտեսական խորհրդի նիստում, երբ պետությունների ղեկավարներին պետք է ներկայացվի 2014 թվականի մայիսի 29-ի ԵԱՏՄ պայմանագրի գործողությունը Հայաստանի նկատմամբ կասեցնելու հնարավոր հետևանքների վերաբերյալ զեկույցը», — արձանագրել է Գալուզինը։