Ընտրություններին ընդառաջ վարչական լծակների օգտագործումը նոր բան չէ ինչպես գործող, այնպես էլ նախկին իշխանությունների համար։ Այդ երևույթին ականատես ենք եղել 2021 թվականին էլ, նախկինում էլ, Azg.am-ի թղթակցի հետ զրույցում ասաց քաղաքագետ Դավիթ Հարությունովը՝ անդրադառնալով ընդդիմադիր գործիչների բնակարաններում զանգվածային խուզարկություններին և «Ուժեղ Հայաստան» կուսակցության ՝ մոտ 30 պատգամավորության թեկնածուի ձերբակալության հնարավորության մասին լուրերին։
Ըստ քաղաքագետի՝ գործող իշխանություններն արդեն իսկ եզրակացություններ են արել իշխանության գալու իրենց փորձից և աշխատում են իշխանության համար պայքարում օգտագործել բոլոր հնարավոր լծակները՝ բացառելով ցանկացած կոմպրոմիս։
Դավիթ Հարությունովն այս առումով հիշեցրեց «Սրբազան պայքար» շարժման առաջնորդ հոգևորականներին, որոնք թեպետ պաշտոնապես հանդես չէին գալիս որպես ընդդիմություն, սակայն դա չէր խանգարում ՀՀ իշխանություններին ամեն կերպ ճնշումներ գործադրել շարժման, նրա առաջնորդների և հետևորդների վրա։
«Այդ տրամաբնությունը հիմա էլ կա. օգտագործվում են հնարավոր բոլոր լծակները։ Բայց պետք է ասեմ, որ ընդդիմությունն էլ իր առանձնահատկություններն ունի։ Ընդդիմությունը շատ այլ լծակներ ունի, այսինքն՝ մենք գործ ունենք քաղաքական վերնախավի երկու թևի հետ. մեկն ավելի շատ օգտագործում է պետական ապարատը, մյուսն ունի ֆինանսական լուրջ ռեսուրսներ»- ասաց մեր զրուցակիցը։
Դավիթ Հարությունովը տեսականորեն չբացառեց Հայաստանում մոլդովական սցենարի կրկնությունը, այն է՝ ընտրություններից մեկ-երկու օր առաջ հիմնական ընդդիմադիր ուժի կամ ուժերի մասնակցության կասեցումը։
«Բայց դա հարված կհասցնի ընտրությունների լեգիտիմությանը, այսինքն՝ իշխանության տարած հաղթանակը, մեղմ ասած, լիարժեք չի լինի։ Հայաստանյան քաղաքական պրակտիկայում, հիշենք, նման բան չի եղել։ Պայքարն ավելի շուտ գնացել է հենց քվեարկության ընթացքում, ընտրակեղծիքներ են եղել, սակայն հիմնական ընդդիմադիր ուժերին պայքարից հանելու փորձ մենք չենք ունեցել։
Ինչ վերաբերում է հետընտրական հնարավոր կոալիցիաներին, ապա դա պատմականորեն ընդդիմության խնդիրներից է եղել։ Հիմա ևս այդ խնդիրը գոյություն ունի՝ այն առումով, որ ընդդիմության միասնական թեկնածու չկա։ Այդ դեպքում իշխանության համար ավելի դժվար կլիներ։ Սակայն ընդդիմության կողմից հնչած հայտարարությունները խոսում են այն մասին, որ միավորվելու հնարավորությունը տեսականորեն կա»,- ամփոփեց Դավիթ Հարությունովը։
