Արցախցիները պահանջագիր են ներկայացնում Եվրոպայի առաջնորդներին

Արցախցիներն ունեն իրենց հայրենիք անվտանգ, արժանապատիվ և հավաքական վերադարձի իրական հնարավորություն և իրավունք

Եվրոպական քաղաքական համայնքի «խաղաղության և անվտանգության» առաքելությունը չի կարող անտեսել ադրբեջանական ագրեսիայի հետևանքով հայ ժողովրդի կրած տառապանքները.

1. Գերիներ և պատանդներ. Միջազգային հանրության, այդ թվում՝ Եվրոպական քաղաքական համայնքի լռությունը խրախուսում է Բաքվի վարչակարգին՝ մարդկային կյանքերն օգտագործել որպես քաղաքական սակարկության առարկա:

2. Մշակութային ցեղասպանություն. 2020թ․ սեպտեմբերի 27-ից մինչև 2026թ․ ապրիլի 21-ը արձանագրվել է վանդալիզմի ավելի քան 1000 դեպք, Ադրբեջանը ապօրինի կերպով քանդում կամ բնակեցնում է Լեռնային Ղարաբաղի բնակիչների տներն ու այլ մասնավոր գույքը՝ կոպիտ կերպով խախտելով ՄԱԿ-ի Արդարադատության միջազգային դատարանի 2023թ. Նոյեմբերի 17-ի հրամանը:

3. Վերադարձի իրավունք. Վերադարձի իրավունքն, ըստ էության, ազատ տեղաշարժի իրավունքին առնչակից իրավունք է և գտնվում է միջազգային հստակ պաշտպանության ներքո, ինչից բխում է, որ բռնի տեղահանված անձինք չեն կարող զրկվել իրենց հայրենիք վերադառնալու իրավունքից, և այն ենթակա է միջազգային պաշտպանության և երաշխավորման։

«Տե՛ր կանգնենք ժողովրդավարությանը և իրավունքներին Հայաստանում»

Եվրոպական քաղաքական համայնքի 8-րդ գագաթնաժողովի նախաշեմին մենք պաշտոնական նամակներով դիմել ենք եվրոպական բարձրագույն ղեկավարությանը՝

Եվրոպական խորհրդի նախագահ Անտոնիու Կոշտային,

Եվրոպական հանձնաժողովի նախագահ Ուրսուլա ֆոն դեր Լայենին,

Եվրոպական խորհրդարանի նախագահ Ռոբերտա Մեցոլային,

ԵՄ արտաքին գործերի և անվտանգության քաղաքականության բարձր ներկայացուցիչ Կայա Կալլասին,

ինչպես նաև եվրոպական երկրների ղեկավարներին և կառավարությունների ղեկավարներին։

Մեր ուղերձում բարձրացրել ենք մի շարք հրատապ խնդիրներ՝

• Հայաստանում ժողովրդավարական ինստիտուտների թուլացում

• դատական համակարգի նկատմամբ ճնշումներ

• խոսքի ազատության սահմանափակումներ

• Ադրբեջանում ապօրինի պահվող հայ ռազմագերիների և պատանդների հարց

• Արցախում մշակութային ժառանգության ոչնչացում

• Արցախցիների անվտանգ և արժանապատիվ վերադարձի իրավունք

Մենք ընդգծում ենք՝ ժողովրդավարությունն ու մարդու իրավունքները չեն կարող ստորադասվել քաղաքական կամ ռազմավարական շահերին։

Այս նախաձեռնությունը համախմբել է Հայաստանի քաղաքացիական հասարակության և քաղաքական դաշտի լայն շրջանակ՝ հասարակական կազմակերպություններ, կուսակցություններ և բազմաթիվ անհատներ՝ ձևավորելով կարևոր միասնական դիրքորոշում այս հիմնարար հարցերի շուրջ։

Գագաթնաժողովի ընթացքում մեր նախաձեռնության ներկայացուցիչները կանցկացնեն շարունակական խաղաղ ակցիաներ՝ ուշադրություն հրավիրելու այս խնդիրների վրա։

Մենք պատրաստ ենք նաև հանդիպել եվրոպական գործընկերների հետ և ներկայացնել առկա իրավիճակը։

Ամբողջական կոչին կարող եք ծանոթանալ այստեղ՝ https://www.facebook.com/61570753506708/posts/122104489760691783/?mibextid=wwXIfr&rdid=eGEugT3JbogdvQrj#