Ուզբեկական Nuz.uz կայքէջը տեղեկացնում է, որ մարտի 29-ին Տաշքենդի Ալիշեր Նավոյիի անվան պետական ակադեմիական Մեծ թատրոնում տեղի է ունեցել համերգ՝ նվիրված հայազգի ուզբեկական արտիստուհի Թամարա Խանումի ծննդյան 120-ամյակին: Թամարա Խանումը (Թամարա Արտեմի Պետրոսյան, 1906-1991) պատմության մեջ մտել է որպես երգչուհի, պարուհի, բեմադրիչ եւ դերասանուհի, առաջիններից մեկը՝ որն ուզբեկական ժողովրդական պարը բերել է բեմ, կատարել տարբեր ժողովուրդների երգեր ու պարեր՝ ձեւավորելով այնպիսի երկացանկ, որտեղ միաձուլվում էին երաժշտությունը, շարժումը եւ ազգային ավանդույթը:
Այդ երեկո թատրոնը լցված է եղել առանձնահատուկ տրամադրությամբ: Համերգից առաջ թատրոնի նախասրահում բացվել է Թամարա Խանումի կյանքին եւ ստեղծագործությանը նվիրված ցուցահանդես՝ լուսանկարներ, բեմական զգեստներ, փաստաթղթեր: Համերգի ծրագիրը կառուցված է եղել որպես ճանապարհորդություն նրա ստեղծագործական ժառանգության միջով: Հանդես են եկել «Բահոր», «Բերյոզկա», «Շոդլիկ» համույթները, Նավոյիի անվան Մեծ թատրոնի, Պետական ֆիլհարմոնիայի ու կոնսերվատորիայի երիտասարդական երգչախմբի եւ Տաջիկստանի պետական ֆիլհարմոնիայի մենակատարները: Կատարվել են ուզբեկական երգեր եւ պարեր, նաեւ տարբեր ժողովուրդների մշակույթն արտացոլող համարներ՝ ճապոնական «Սակուրա» երգից մինչեւ հայկական (գուսան Աշոտի «Սարի սիրուն յարը») եւ տաջիկական երգերը:
Համերգն անցել է առանց ընդմիջման եւ դահլիճի ուշադրությունը կենտրոնացած է պահել մինչեւ վերջ: Ըստ կայքէջի՝ անհետացել է «հոբելյանականի» զգացողությունը, եւ Թամարա Խանումը ներկայացված է եղել ոչ թե որպես հիշողություն, այլ որպես կենդանի ներկայություն:
Հիշենք, որ չնայած Ուզբեկստանում ծնված եւ ողջ կյանքն այնտեղ ապրած լինելու հանգամանքին, Թամարա Խանումը եղել է ազգային շեշտված նկարագրով հայուհի: Հայտնի է, որ 1988 թվականի Հայաստանի ավերիչ երկրաշարժից հետո արտիստուհին իր ողջ կարողությունը նվիրաբերել է տուժածներին՝ ոչինչ չթողնելով իր դուստրերին եւ նրանց ընտանիքներին:
Ա. Բ.
