Սա պատերազմ չէ, որը մենք ենք սկսել, այլ պատերազմ, որը պարտադրվելէ մեզ։ Մենք ամբողջ ուժով, վճռականությամբ և ամուր ոգով պաշտպանում ենք ինքներս մեզ. քանի դեռ ագրեսիան շարունակվում է, Իրանի ժողովուրդը և Իրանի Իսլամական Հանրապետության զինված ուժերը պաշտպանելու են իրենց երկիրը։ Այս մասին «Շանթ» հեռուստաալիքին տված հարցազրույցում հայտարարել է Հայաստանում Իրանի դեսպան Խալիլ Շիրղոլամին։
Լրագրողը հետաքրքրվել է՝ Իրանի գնահատմամբ ո՞րն է այս պատերազմի իրական նպատակը, և արդյոք այս սցենարը կանխատեսելի էր իր երկրի համար։
Ի պատասխան՝ դեսպանը նկատել է՝ Իրանը բանակցությունները սկսել էր շատ լուրջ և անկեղծ տրամադրվածությամբ և նույն լրջությամբ էլ շարունակել դրանք։
«Ժնևում տեղի ունեցած վերջին փուլում իրանական կողմը սկզբունքային և համապարփակ համաձայնությանը մոտենալու և այդ համաձայնության հիմքերը դնելու նպատակով ներկայացրել էր շատ գործնական և գրավիչ առաջարկությունների փաթեթ։ Եթե ուսումնասիրեք բանակցություններից հետո ամերիկյան կողմի հայտարարությունները, ապա կտեսնեք, որ նրանք նույնպես նշել էին բանակցությունները լավ ուղղությամբ էին ընթանում։
Սակայն պարոն Թրամփը, ցավոք, ներգրավվեց այս ագրեսիվ պատերազմում իր շրջապատում գտնվող պատերազմի մոլուցք ունեցող որոշ անձանց, այդ թվում՝ Նեթանյահուի ազդեցությամբ, որը մշտապես փորձում է սադրել, հակամարտություններ և ծախսեր ստեղծել։ Ծախսեր, որոնք վճարվում են ամերիկյան ժողովրդի գրպանից, սակայն ծառայում են սիոնիստական ռեժիմի շահերին։
Մինչ դիվանագիտական գործընթացը բնական հունով շարունակվում էր, նրանք հանկարծակի հարձակվեցին Իրանի վրա։ Իհարկե, մենք չէինք բացառել դեպքերի նման զարգացման հավանականությունը, այդ պատճառով մեր զինված ուժերը լիովին պատրաստ էին։ Մենք նաև նախազգուշացրել էինք, որ ցանկացած տարածք կամ երկիր, որից ԱՄՆ-ն կօգտվի Իրանի դեմ հարձակում իրականացնելու համար, կդառնա օրինական թիրախ մեզ համար։
Մենք հավատարիմ մնացինք իրական և ազնիվ բանակցությունների սկզբունքների. նրանք էին որ դավաճանեցին այդ սկզբունքներին և սկսեցին այս ագրեսիվ պատերազմը»,- ասել է դեսպանը։
Անդրադառնալով այն դիտարկմանը, որ Իրանի ԱԳ նախարար Աբաս Արաղչին մերժել է հրադադարի հնարավորությունը՝ ընդգծելով, որ պետք է լինի հակամարտության մշտական ավարտ. արդյո՞ք Իրանը պատրաստ է երկարաժամկետ պատերազմի, Խալիլ Շիրղոլամին ասել է.
«Սա հիմնված է 12-օրյա պատերազմի փորձի վրա։ Պատերազմի երկրորդ օրը պարոն Թրամփի հնչեցրած անվերապահ հանձնվելու կարգախոսը մի քանի օր անց վերածվեց անվերապահ հրադադարի։ Նրանք դիմեցին հրադադար հաստատելու համար, քանի որ Իսրայելի ռեժիմը ծանր հարվածներ էր կրում, և զարմացած էին Իրանի ուժից։ Իրանը բարի կամք դրսևորեց և ընդունեց այն։ Փորձը ցույց տվեց, որ փխրուն հրադադարը չի կարող աշխատել, քանի որ թշնամին կարող է ամեն պահի և ամեն անգամ շարունակել իր ագրեսիան։ Ուստի այժմ մեր դիրքորոշումն այն է, որ եթե պետք է հրադադար հաստատվի, նախ պետք է դադարեցվի ագրեսիան, այսինքն՝ Իրանի վրա սիոնիստական ռեժիմի և Ամերիկայի ագրեսիան, և երկրորդը հրադադարի համար պետք է սահմանվի հստակ օրինական և ինստիտուցիոնալ մեխանիզմ՝ առավել նախընտրելի է ՄԱԿ-ի ԱԽ-ի շրջանակներում, որը կվերածվի գրավոր փաստաթղթի, և կորոշվի ագրեսորը։ Այսինքն՝ միջազգային հանրությունը պետք է ընդունի, թե ով է եղել ագրեսորը և դատապարտվի ագրեսորը։
Պետք է հստակեցվի նաև այն փոխհատուցումների և վնասների հարցը, որոնք ագրեսորները հասցրել են Իրանի Իսլամական Հանրապետությանը, և եթե պետք է լինի հրադադար կամ խաղաղություն, ապա այն պետք է վերածվի վստահելի միջազգային փաստաթղթի, որպեսզի նրանք այլևս չկարողանան՝ երբ ցանկանան կրկնել իրենց թշնամական և ագրեսիվ գործողությունները. սա մեր սկզբունքային դիրքորոշում է։
Քանի որ կրկին հաղորդագրություններ են ստացվել հրադադարի վերաբերյալ, Իրանի Իսլամական Հանրապետությունը ասում է, որ չի կարող վստահել: Դուք խոսում եք հրադադարի մասին, որովհետև ճնշման տակ եք հայտնվել, որովհետև չեք հասել այն նպատակներին, որոնց կարծում էիք՝ կհասնեք՝ սպանելով Իրանի առաջնորդին և մեր ռազմական հրամանատարներին և զարմացած եք Իրանի Իսլամական Հանրապետության կրակային հզորությունից:
Պարսից ծոցում գտնվող ձեր ավիաբազաներում ձեր կապիտալից մի քանի տրիլիոն դոլարներ ոչնչացվել են, շատ զոհեր ու վիրավորներ ունեք և հիմա եկել եք խոսելու հրադադարի մասին։
Որքան անհրաժեշտ է, Իրանը պատրաստ է այս հարձակման դեմ պաշտպանել ինքն իրեն։ Մենք ժամանակային առումով սահմանափակում չունենք»,- ասել է դեսպանը։
