Ռուսական ցորենով բեռնված գնացքը (15 վագոն) ժամանել է Հայաստան՝ անցնելով Ադրբեջանի և Վրաստանի տարածքով։
Դեպի Հայաստանի բեռնափոխադրումների սահմանափակումների վերացումը Ադրբեջանի կողմից կարևոր քայլ է տարածաշրջանային հաղորդակցությունների վերականգնման և տնտեսական համագործակցության խթանման ուղղությամբ։
Այն հանդիսանում է Վաշինգտոնում ձեռք բերված պայմանավորվածությունների գործնական իրականացումներից մեկը՝ նպաստելով Հայաստանի և Ադրբեջանի միջև հաստատված խաղաղության ինստիտուցիոնալացմանը։
ՀՀ Էկոնոմիկայի նախարար Գևորգ Պապոյանը օրը պատմական է որակել՝ անդրադառնալով Ադրբեջանի տարածքով ռուսական ցորենի Հայաստան մուտքին։
«Գրեթե 3 ու կես տասնամյակ այս երթուղով Հայաստան բեռներ չէին տեղափոխվել, և ըստ էության, կարելի է ասել` այս երթուղին արդեն գործարկված է։ Առաջիկայում Հայաստան կժամանի նաև ղազախական ծագման ցորենը, որը դեռ Ադրբեջանի տարածքում է»,–«Այրում» կայրանում գնացքը դիմավորելուց հետո լրագրողներին ասաց ՀՀ էկոնոմիկայի նախարարը։
