Բոլոր մոտիվները պետք է անպայման ուսումնասիրվեն, բայց մի բան պարզ է՝ փողոցում վխտում են ապօրինի զենքով մարդիկ, որոնք այս իշխանության իրավապահ համակարգի անգործության հետևանք են։ Եվ եթե այս սպանությունը չբացահայտվեց, այն բացահայտվելու է վաղը, և անգործության մատնված անձինք նույնպես պատասխան են տալու։ Այնպես որ օր առաջ թող լծվեն այս սպանությունը բացահայտելուն, լրագրողների հետ զրույցում ասաց «Ապրելու երկիր» կուսակցության համահիմնադիր Մանե Թանդիլյանը՝ անդրադառնալով Փարաքար համայնքի ղեկավար Վոլոդյա Գրիգորյանի սպանությանը։
«Պետք է բացահայտել, որովհետև պատահական բաներ տեղի չեն ունենում։ Եթե մինչև այս արած լինեին իրենց աշխատանքը, այս սպանությունը տեղի չէր ունենա։ Վոլոդյա Գրիգորյանն այնքան ուժեղ մարդ էր, որ 24 ժամ զբաղված էր իր սիրելի համայնքը կառուցելով, իր աշխատանքով։
Ես հասկանում եմ, որ նաև հաշվեհարդարի վարկած է շրջանառվում, բայց դա պատիվ չի բերումիրավապահ համակարգին։ Իրենց գործը չեն արել. դա միայն դրա մասին է։ Իրավապահների գործը վարկածներ մտածելը չէ, այլ պատշաճ կերպով ու ժամանակին քայլեր ձեռնարկելը։
Քաղաքական մոտիվներ, ինչ-որ ֆեյքեր սպառնալիքներ ինձ էլ են ուղարկում՝ նաև այսօր՝ այս դեպքի հետ կապված։ Բարձիթողի վիճակ է, մարդիկ իրենց տեղում չեն, զբաղված են անպատեհ դատավարություններով, որոնք կապ չունեն հանցագործությունների հետ։ Իրական հանցագործները փողոցում են՝ անօրինակ զենքով։ Թող իրենց գործով զբաղվեն»,- ասաց Մանե Թանդիլյանը։
Անդրադառնալով Նիկոլ Փաշինյանի՝ սպանությունը դատապարտող ֆեյսբուքյան գրառմանը՝ նա հարց հնչեցրեց՝ ո՞ւմ է Փաշինյանն ասում, որ հանցագործությունը պետք է կանխվեր։
«Ո՞ւմ է ասում, ո՞ւմ հետ է խոսում, բավական է ստատուսագիր լինի, թող իրավապահ համակարգին գործի դնի, և այս սպանությունը բացահայտվի։
Փարաքար համայնքում Վոլոդյայի սկսած գործերը շարունակվելու են, բայց որ այս սպանությունը բացահայտվի, հաստատ է։ Ամեն օր իրենց շնչին կանգնելու ենք, պիտի իմանան, որ չեն մարսելու։ Այսօր ևեթ ռադ եղեք, թող գան մարդիկ, որոնք գործ են կարողանում անել»,- ամփոփեց Թանդիլյանը։
