Ընդհանրապես աշխարհում շատ քիչ տեղերում է, ինչքան որ ես գիտեմ, որ էլեկտրաբաշխիչ ցանցերը բացառապես մասնավոր են։ Ամենաշատը այդպիսի հինգ երկիր կարող եմ մտաբերել։ Լրագրողների հետ զրույցում այսօր այս մասին ասաց ԱԺ ՔՊ խմբակցության պատգմավոր Արման Եղոյանը։
«Դե դա սովորական բիզնես չի, դա հանրային ծառայություն մատուցող բիզնես է, ու այդ բիզնեսը նաու ունի պարտավորություններ։ Իզուր չի, որ դրա գործունեությունը կարգավորում է ՀԾԿ հանձնաժողովի միջոցով, այսինքն դա խանութ չի էլի, որ մի օր բացես, մի օր փակես, մի օր ապրանք մատակարարես, մի օր չմատակարարես, մի օր լավ մատակարարես, մի օր չմատակարարես։ Դա հանրային ծառայություն է։ Իրենք ստանձնել էին պարտականություն 2015 թվականին կատարել կոնկրետ թվով ներդրում։ Այն ժամանակ էլի շատ վատ վիճակ էր ՀԷՑ–ում, ու ինչպես ժամանակը ցույց տվեց, դե մաշվում է՝ լարերը, տրանսֆորմատորները, ենթակառուցվածքները մաշվում են, ու անընդհատ պիտի ներդրում անես։
Վերջին շրջանի տատանումները, հոսանքազրկումները, նաև ՀԾԿՀ ուսումնասիրությունները ցույց են տալիս, որ բավարար աշխատանք չի արվել։ ՀԾԿՀ–ի նախկին ղեկավարը նույնիսկ ընդունում էր, որ իրենք անհրաժեշտ քանակի ներդրումներ չեն արել այնտեղ։
Հիմա շատերն ասում են՝ նոր ենք հիշել այս թեման։ Ես ուզում եմ հիշեցնել, որ այն ժամանակ, երբ Գարեգին Բաղրամյանը հրաժարական տվեց, այդ ժամանակ մենք իրեն հրավիրեցինք ֆրակցիա, ունեցանք խոսակցություն։ Այն ժամանակ ո՛չ եկեղեցականների հետ կապված թեման կար, ո՛չ Սամվել Կարապետյանի։ ՀԷՑ–ի հարցն էինք մենք քննարկում։ Քննարկեցինք ու այդտեղ բացահայտեցինք, ի զարմանս մեզ, որ ահռելի թվով ներդրումներ այնտեղ չեն կատարվել կամ արդյունավետ չեն կատարվել։ Էլ չասած նրա մասին, որ ՀԷՑ–ը մի շարք դեպքերում չարաշահում է իր մոնոպոլ դիրքը։ Մասնավորապես, մենք շատ բողոքներ ենք ստանում նոր բաժանորդներից, որ ստիպում է իրենց նոր բաժանորդ դառնալուց հետո համապատասխան հաշվիչները կամ տրանսֆորմատորները ձեռք բերել իրենց հետ փոխկապակցված ընկերությունից։
Անընդհատ դուք բողոքում եք ՀԷՑ-ից, ասում եք՝ ո՞ւր է նայում պետությունը, հիմա պետությունը նայում է՝ ասում եք՝ ինչի ես նայում»,-ասաց նա։
Հարցին՝ արդյոք ներդրումների հարցը քննարկվել է Սամվել Կարապետյանի հետ, Եղոյանը դրական պատասխան տվեց։
«Իհարկե, քննարկվել է։ Դուք հիշում եք, որ հեղափոխությունից հետո իր հետ հաստատվել էին շատ նորմալ բարիդրացիական հարաբերություններ՝ հաշվի առնելով որ մեր հայրենակիցն է՝ որոշակի հաջողությունների հասած»։
Արման Եղոյանը հստակեցրեց, որ հիմա նպատակը ՀԷՑ-ը պետականացնելն է։
Անդրադառնալով նրան, որ երեկ վարչապետ Նիկոլ Փաշինյանը հայտարարեց, որ ՀԷՑ–ն ազգայնացնելու վերաբերյալ արդեն օրենքի նախագիծ կա ԱԺ-ում, Եղոյանն ասաց, որ ինքը նման նախագծից տեղյակ չէ։
