Իսկ դուք վստա՞հ եք որ Նիկոլ Փաշինյանը դեմ է իմպիչմենտին. Ես. Օրինակ, վստահ չեմ, մի քանի լրատվամիջոցի տված հարցազրույցում հռետորական հարց հնչեցրեց ՀՀ երկրորդ նախագահ Ռոբերտ Քոչարյանը՝ անդրադառնալով հնչող հայտարարություններին, թե Նիկոլ Փաշինյանի դեմ խորհրդարանում անվստահության գործընթաց սկսելուն դեմ է մեկ Նիկոլ Փաշինյանը, մեկ էլ ինքը։
«Իմպիչմենտի՝ ակնհայտ զրոյի ձգտող հավանականությունը բերելու է նրան, որ Նիկոլ Փաշինյանը վեց ամիս որևէ նման գործընթաց չունենալու երաշխիք է ունենալու։ Ես վստահ չեմ, որ դա ճիշտ է։ Ուղղակի քարոզիչներ կան, որ մտել են այս խնդրի մեջ՝ իմ տպավորությամբ լավ չպատկերացնելով, թե ինչ են անում։
Ես չեմ լսել մեկ մարդու կարծիք, որ դա իրատեսական սցենար է։ Նույնիսկ նախաձեռնողներն ասում են՝ «Հա ի՞նչ է եղել, փորձենք, չլինի՝ չլինի»։ Անգամ նւոյն թեկնածուն 10 օր առաջ ասում էր՝ «Դա իրատեսական չէ»։
Հիմա ես ավելի պրագմատիվ մարդ եմ, և մտնել մի պրոցեսի մեջ, որը զրոյին ձգտող հաջողության հավանականություն ունի, ինձ համար դա իսկապես հետաքրքիր չի։ Ես կարող եմ ասել, թե ում է դա հետաքրքիր։ Օրինակ՝ կարող է մարդ կա, ում համար 48 ժամ լիներ վարչապետի թեկնածու՝ դա կյանքի երազանք է։ Պատկերացնո՞ւմ եք, հանկարծ անհայտ մեկը, ոչ մեկը քո տեղը չգիտի, ու դու քննարկումների կենտրոնում ես հայտնվում, հարցազրույցներ ես տալիս, քեզ տաղավարներ են հրավիրում, օնլայն քո հետ միանում են, դու կարծիք ես ասում, դու դառնում ես այդ պահի համար մի կենտրոնական դեմք։
Եթե մարդու համար 48 ժամ ուշադրության կենտրոնում լինելը կյանքը երազանք է, դա չի նշանակում, որ մենք պետք է ֆոն կամ դեկորացիա դառնանք՝ այդ երազանքը իրականացնելու համար։ Ի դեպ, բառն էլ ճիշտ չի օգտագործվում, խոսքը վստահության քվեի մասինէ։
Ասում են՝ փողոցի ճնշման ճանապարհով հարցը պետք է լուծել։ Եթե դու այնպիսի փողոց ես հավաքել, և ճնշումդ այնպիսի ուժգին է, որ կարող է 20 հոգի հրաժարվել, հենա հրաժարական եք պահանջում, էլ քվեարկելս ո՞րն է։ Վարչապետը հրաժարական է տալիս, հարցը լուծում ես։ Իսկ դրա համար պետք է նախահեղափոխական իրավիճակ փողոցում։ Այսինքն՝ իշխանությունը պետք է կորցնի փողոցի վերահսկողությունը։ Սա նշանակում է հրաժարական կամ հեղափոխություն։ Սիրուն անուններով, ինչ-որ Սահմանադրության վրա հղումներ կատարելով, բան-ման՝ անլուրջ է։
Եթե մարդկանց հետաքրքիր է դա, թող զբաղվեն։ Դա ինֆորմացիոն առիթ է տալիս հարցազրույցներ տալ, ճանաչելիություն է ավելացնում ինչ-որ մարդկանց, ում քիչ են ճանաչում և ովքեր նեղվում են դրանից միգուցե»,– ասաց Ռոբերտ Քոչարյանը։
