ՀՖՖ նախագահ Արմեն Մելիքբեկյանը սրտնեղում է, որ Հայաստանի ազգային հավաքականի պարտությունների ժամանակ ՀՖՖ-ի հասցեին մեղադրական հայտարարություններ են արվում։
«Երբ հավաքականը 2020 թվականին պատմության մեջ առաջին անգամ որևէ մրցաշարում հաղթեց, այն ժամանակ արժանիորեն մեծարվեց հավաքականի մարզիչ Կապարոսը, բայց ֆեդերացիան անտեսվեց։ Մեզ համար դա խնդիրր չէ, բայց, սովորաբար, երբ հակառակն է լինում, ու հավաքականը անհաջողություններ է ունենում, ֆեդերացիան միշտ մեղավոր է»,- այսօր կայացած մամուլի ասուլիսի ժամանակ ասաց Մելիքբեկյանը։
Ըստ ՀՖՖ նախագահի՝ իրենք հասկանում են, որ վերջին խաղերում հավաքականի պարտությունները շատ ծանր պարտություններ են, ու դա շատ ծանր են տանում։
Մելիքբեկյանը միաժամանակ համոզմունք հայտնեց՝ կան մարդիկ, որոնց համար երազանք է ՀՖՖ նախագահի աթոռին հայտնվելը, և այդ նպատակով ֆեդերացիայի դեմ հստակ ծրագրված արշավ է իրականացվում:
«Վերջին շրջանում հատկապես մենք տեսնում ենք, որ հրապարակվում են տարբեր նյութեր, որոնք բացարձակ կապ չունեն Հայաստանի ֆուտբոլի ֆեդերացիայի ու իմ գործունեության հետ: Դրանք կրում են պատվիրված բնույթ: Կան մարդիկ, որոնց համար երազանք է հայտնվել Հայաստանի ֆուտբոլի ֆեդերացիայի նախագահի աթոռին: Իրենց նպատակին հասնելու համար նրանք չեն խորշում իրենց ամենաստոր նպատակներից: Օգտագործվում է մեծ մեդիա ռեսուրս, որն, ընդհանուր առմամբ, թյուրըմբռնում է առաջացնում»,- հայտարարեց նա։
ՀՖՖ նախագահի խոսքով՝ իրենք հասկանում են, որ պարտությունները շատ ծանր:
«Կա մի զանգված, որն անընդհատ ուզում է այդ պարտությունները տեսնել, որպեսզի անընդհատ բարձրաձայնի, քննադատի, մեղադրի ֆեդերացիային: Բոլորը պատասխանատու են այս պարտությունների համար՝ ֆեդերացիան, հավաքականը, մարզիչները, ֆուտբոլիստները:
Կան երկու պատճառներ, որոնք այժմ մենք քննարկում ենք և ուսումնասիրում: Հանդիպումներ ենք ունեցել մարզիչների և ֆուտբոլիստների հետ: Նոր մարզիչը որոշ լուծումներ է տվել, բայց, հասկանալի է, որ նրան պետք է ժամանակ տանք»,- ասաց Մելիքբեկյանը:
