ՀՀ ԱԺ պատգամավոր Տիգրան Աբրահամյանը գրում է. «Ադրբեջանի պաշտպանության նախարարն իր ամենշաբաթյա խորհրդակցությունում լայն քննարկման է ենթարկել հայ-ադրբեջանական սահմանագծին առկա օպերատիվ իրադրությունը` հայկական կողմին մեղադրելով հրադադարի ռեժիմի խախտումների մեջ, այդ թվում` ԱԹՍ-ների թռիչքների առումով:
Պաշտոնական տեղեկություններով, Ադրբեջանի ռազմական գերատեսչության ղեկավարը կոնկրետ խնդիրներ է դրել պատասխանատուների վրա` «օպերատիվորեն արձագանքելու ցանկացած սադրանքի»:
Սկսենք այն հանգամանքից, որ Ադրբեջանն ինքն է վերջին 2 շաբաթվա ընթացքում աստիճանաբար լարում իրադրությունն առաջնագծում` աստիճանաբար ընդլայնելով հրադադարի խախտումների աշխարհագրությունը, ընդհուպ կրակահերթեր արձակելով սահմանամերձ գյուղերի ուղղությամբ:
Երկրորդ, Ադրբեջանն առաջնագծում իրականացվող իր` դեռևս սահմանափակ տեղաշարժերն ու ԱԹՍ ակտիվությունը, փորձում է վերագրել հայկական զինուժին:
Այս ամենը տեղի է ունենում, կառավարության շենքից Փաշինյանի` ՀՀ զինուժին ուղղված հրապարակային հրամանից հետո` «ՉԿՐԱԿԵԼ, ՉԱՐՁԱԳԱՆՔԵԼ»:
Իմ տպավորությամբ, Ադրբեջանը սադրանքի գնալու «լեգիտիմ հիմք» է ձևավորում` միաժամանակ շոշափում միջազգային տրամադրությունները»:
