2024 թվականի դեկտեմբերի 21-ին Երեւանի Ավետիք Իսահակյանի տուն-թանգարանում տեղի ունեցավ Երեւանի Ռոմանոս Մելիքյանի անվան պետական երաժշտական քոլեջի իգական երգչախմբի մենահամերգը` «Հայ խմբերգային երաժշտության երեկո» խորագրով (խմբավար` Գրիգոր Հարությունյան, դաշնակահար` Լիլիթ Աբովյան): Ծրագրում ընդգրկված էին տարբեր դարաշրջանների հայ հոգեւոր երգասացություններ, ինչպես նաեւ հայ դասական եւ ժամանակակից կոմպոզիտորների խմբերգեր:
Համերգը մեկնարկեց Արարատյան Հայրապետական թեմի առաջնորդանիստ Սուրբ Սարգիս եկեղեցու հոգեւոր հովիվ Տ. Պետրոս ավագ քահանա Մալյանի օրհնության խոսքով: Երեկոն իրենց ներկայությամբ պատվել էին Երեւանի Ռոմանոս Մելիքյանի անվան պետական երաժշտական քոլեջի տնօրեն Վարազդատ Խաչումյանը, փոխտնօրեն Սաթենիկ Ղափլանյանը, Հայաստանի Երաժշտական Ընկերության նախագահ պրոֆեսոր Դավիթ Ղազարյանը, Երեւանի Կոմիտասի անվան պետական կոնսերվատորիայի վոկալ-տեսական ֆակուլտետի դեկան դիրիժոր Ռուբեն Ասատրյանը, Երեւանի Քանաքեռ-Զեյթուն վարչական շրջանի ԿԳՄՍ վարչության պետ Սամվել Ադամյանը, Հայաստանի Կոմպոզիտորների Միության երգչախմբային բաժնի պատասխանատու կոմպոզիտոր Ստեփան Բաբաթորոսյանը, ինչպես նաեւ քոլեջի մանկավարժական անձնակազմը:
Համերգի նպատակն էր լայն հանրությանը հասանելի դարձնել հայ հոգեւոր երգասացությունները` հանդիսատեսին ի մոտո ծանոթացնելով Հայաստանյաց եկեղեցում հնչող անգին գոհարներին:
Երգչախմբի կատարումները արժանացան ներկաների բարձր գնահատանքին: Հնչեցին գոհունակության բազմաթիվ խոսքեր:
Խմբավար Գրիգոր Հարությունյանն էլ իր հերթին շնորհակալություն հայտնեց քոլեջի տնօրենությանը` երգչախմբի կայացման ու զարգացման գործում ունեցած նշանակալի ավանդի համար, ինչպես նաեւ բոլոր ներկաներին` խմբերգային երեկոն իրենց ներկայությամբ պատվելու համար:
ԳՐԻԳՈՐ ՀԱՐՈՒԹՅՈՒՆՅԱՆ
